भांगरभूंय | प्रतिनिधी
मुखेली दर्शन मिशाळ आनी मोहीत रेडकार ह्या स्पिनरांनी मॅचींत एकठांय घेतिल्ले 17 विकेटींच्या नेटार जिनो स्पोर्ट्स क्लबान चौगुले स्पोर्ट्स क्लबाक 6 विकेटींनी हारोवपाक येस मेळयलें. जीसीएची प्रिमीयर लीग क्रिकेट सर्तींतली ही तीन दिसांची मॅच जिनोन दुसऱ्याच दिसा सोंपयली.
दर्शन मिशाळान मॅचींत वट्ट 9 विकेटी घेतल्यो जाल्यार मोहीत रेडकाराक 8 विकेटी फावो जाल्यो.
चिखली मैदानाचेर खेळयिल्ले हे लडतींत जिनोन स्पोर्ट्स क्लबान चौगुले स्पोर्ट्स क्लबाच्या पयल्या डावातल्या 154 धांवड्यांक 219 धांवड्यांची जाप दिवन पयल्या डावांत 65 धांवड्यांची आघाडी घेतिल्ली. चौगुलेचो दुसरो डाव दर्शन आनी मोहीत हे जोडयेन फकत 137 धांवड्यांचेर सोंपयलो.
जिनो वतीन दर्शन मिशाळान 5 (मॅचींत 100 धांवड्यो दिवन 9 विकेटी) आनी मोहीत रेडकारान 4 (मॅचींत 72 धांवड्यो दिवन 8 विकेटी) विकेटी घेतल्यो. ते उपरांत जैता खातीर गरजेच्यो धांवड्यो जिनो स्पोर्ट्स क्लबान 4 विकेटी वगडावन केल्यो.
थोडे भितर धांवतकटोः चौगुले स्पोर्ट्स क्लब, (पयलो डाव) 154, जिनो स्पोर्ट्स क्लब (पयलो डाव) 6 बाद 173 वयल्यान 54.4 ओव्हरींनी सगले बाद 219 धांवड्यो (मोहीत रेडकार 23, वासू तिवारी 32 धांवड्यो, किथ पिंटो 5-77, जगदीश पाटील 3-15, ऋत्विक नायक आनी फरदीन खान दरेकी एक विकेट), चौगुले स्पोर्ट्स क्लब, (दुसरो डाव) 45 ओव्हरींनी सगले बाद 137 धांवड्यो ( रोहन कदम 40, ऋत्विक नायक 20, मंथन खुटकार 19, किथ पिंटो 13 धांवड्यो, दर्शन मिशाळ 5-61, मोहीत रेडकार 4-27, लक्ष्य गर्ग 1-18). जिनो स्पोर्ट्स क्लब, (दुसरो डाव) 21.4 ओव्हरींनी 4 बाद 78 धांवड्यो ( दर्शन मिशाळ नाबाद 35, आनंद तेंडुलकार नाबाद 17, शाश्वत रावत 15 धांवड्यो, किथ पिंटो 2-32, आयुष वेर्लेकार आनी दिनेश रायकार दरेकी एक विकेट).
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
