भांगरभूंय | प्रतिनिधी
पणजी, बातमीदार ः भारतीय वेंचणूक आयोगान अठराव्या लोकसभा वेंचणुकेचें वेळापत्रक जाहीर केले. देशभरांत19 एप्रील सावन वट्ट 7 पांवड्याचेर मतदान जातलें. तिसऱ्या पांवड्याचेर 7 मेक गोंयांतल्या दोन जाग्यांचेर मतदान जातलें. आनी हे वेंचणुकेचो निकाल 4 जून दिसा जाहीर जातलो. देशांत 96 कोटी मतदार आसात आनी 5 लाख मतदान केंद्रां आसात अशी म्हायती लोकसभेचे मुखेल आयुक्त राजीव कुमार हांणी पत्रकार परिशद घेवन दिली.
गोंयांत लेकसभा वेंचणुकेचें मतदान तिसऱ्या पांवड्याचेर मंगळारा 7 मेक जातलें. भारतीय वेंचणूक आयोगान दिल्ले म्हायती प्रमाण, गोंयांतल्या उत्तर गोंय आनी दक्षीण गोंय ह्या दोन मतदारसंघांत तिसऱ्या पांवड्यार 7 मे दिसा मतदान जातलें. 12 एप्रीलाक ही अधिसुचोवणी जारी जातली. तेन्ना सावन इत्सुक आशिल्ल्यांक अर्ज करपाक मेळटा. अर्ज सादर करपाची निमाणी तारीक 19 एप्रील आसतली. जाल्यार अर्ज फाटीं घेवपाची निमाणी तारीक 22 एप्रील आसतली. उपरांत 7 मे दिसा मतदान जातलें आनी 4 जूनाक मतांची मेजणी जातली.
मजगतीं, देशांत 96.8 कोटी मतदार आसात. तांतूत 1.82 कोटी नवे मतदार आसात. ते भायर 88.4 लाख खाशेले मतदार आसात. 82 लाख वरिश्ठ मतदार आसात. तृतीयपंथी मतदार 38 हजार आसात. मतदान केंद्रांनी 1.5 कोटी अधिकारी सेवा दितले. 85 वर्सां वयर आशिल्ले आनी 45 टक्क्यां परस चड दिव्यांग आशिल्ल्यांचे मतदान घरां वचून घेवपाची तयारी आसा अशें राजीव कुमार हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
