भांगरभूंय | प्रतिनिधी
बोगस काजू विकप्यां पसून सादुर रावपाचो रवी नायक हांचो उलो
पणजी, प्रतिनिधी : गोंयांत आतां आफ्रिके सावन काजु हाडून तो ‘गोंयचो काजु’ म्हूण विकतात. ह्या काजवाचो दर्जो खुबच बाबत देखून गोंयच्या काजवाचें नांव बदनाम जालां. लोकांनी सादुर रावचें आनी हाचेर कारवाय करपा खातीर सरकाराक मजत करची, असो उलो शेतकी मंत्री रवी नायक हांणी मारला.
पणजे नागरी पुरवण मंत्री रवी नायक हांचे हस्तुकी जागतीक गिरायक दिसाचे कार्यावळीचें उक्तावण जालें. उक्तावण सुवाळ्यांक नागरी पुरवण सचिव संजित राॅड्रीग्स, सहकार निबंधक अरविंद बुगडे, सहकार संचालक जयंत तारी आनी हेर मानेस्त हजर आशिल्ले. मुखेल सोयरे म्हण रवी उलयताले.
गोंयांत आता भायले काजू येतात. तांचो दर्जो सामकोच बाबत आनी ते कुशिल्ले आसतात. गिरायक ते घेता. गोंयचे काजु म्हूण हे भायल्या राज्यांनी वतात आनी थंय गोंयचे काजु म्हूण तांची बदनामी जावन गोंयचें नांव पिड्ड्यार जाता, असो आरोप रवी नायक हांणी केलो.
हे फाटभुयेंर लोकांनी सादुर रावपाक जाय. दुकानदार वा गिरायकांक असले बाबत काजु नजरेक आयले जाल्यार तांणी रोखडेच संबंधित खात्याक कळोवंचे. कागाळ येतकच ‘कंज्युमर फोरम’ येवन तांचेर धाड घालतले, अशें मंत्री रवी नायक हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
