भांगरभूंय | प्रतिनिधी
हैदराबाद, खबरां संस्था ः तेलंगण पुलिसांनी एक इतिहासीक पावल उबारलां. तांणी गरुडाक दुस्मानांचे ड्रोन कशे आडावचे, हे संबंदीं खाशेलें प्रशिक्षण दिलां. हाची चांचणी येसस्वीपणान जाल्या. देखून फुडल्या काळांत धोक्याच्या ड्रोनां पसून वाटोवपाक प्रशिक्षीत गरुडांक तैनात करपाची येवजण आसा. पुलीस अधिकाऱ्यांच्या म्हणण्या प्रमाण ह्या गरुडांक दर दिसा एक वर प्रशिक्षण दिताले.
नेदरलँड, फ्रांस देशा सयत युरोपीय देशांनी ह्या प्रकारच्या उपायाची येवजण आसा. आतां युरोपीय देशांची प्रेरणा घेवन दुस्मानाचे ड्रोन कशें आडावप हाचे विशीं गरुड सुकण्यांक प्रशिक्षण दिल्लें आसा. फाटलीं तीन वर्सां सावन हें प्रशिक्षण दिताले. निमाणे हातूंत गरुडांक येस मेळ्ळे. तेलंगणाच्या हैदराबादांतल्या मोझनाबाद हांगाच्या इंटिग्रेटेड इंटेलिजेंस प्रशिक्षण अकादमी (IITA) हे सुवातेर पुलीस महासंचालक रवी गुप्ता आनी वरिश्ठ आयपीएस अधिकाऱ्यांच्या हाजिरेंत एका प्रशिक्षीत गरुडान ड्रोन सकयल उडयलो. देखून तेलंगण पुलिसांचो हो प्रयोग येसस्वी जालो.
व्हीव्हीआयपी भेटी, भौशीक बसका आनी राजकी फुडाऱ्यांच्या कार्यावळींनी दुस्मानाच्या ड्रोनांचो धोको आसता. पूण आतां तेलंगण पुलिसांनी हे प्रशिक्षीत गरुड हे खातीर वापरपाची येवजण आंखल्या. देशांतल्या पुलीस दळांत अशी कार्यवाही जावपाची ही पयलीच घडणूक.
हें घडणुकीचो एक व्हिडियो व्हायरल जाला. खासा प्रशिक्षण घेतिल्ल्या तीन गरुडां मदलो एक गरुड शेडीचेर बशिल्लो ह्या व्हिडियोंत दिसता. हाचे उपरांत अचकीत एक ड्रोन मळबांत उडटा. रोखडोच प्रशिक्षीत गरुड ड्रोना कडेन उडून वता आनी ताका धरून एका सुवातेर सकयल व्हरता. ह्या तीन गरुडां मदीं दोन गरुड दोन वर्सांचे आनी एक गरुड दोन वर्सां परस मात्सो व्हड आशिल्ल्याचे सांगलां. तशेंच हे तिनूय गरुडांक पाळत दवरपाचो अणभव आसा अशें म्हण्टात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
