रॉयल चॅलेंजर्स बंगळुरू फायनलींत

भांगरभूंय | प्रतिनिधी

रॉयल चॅलेंजर्स बंगळुरून काल शुक्रारा मुंबय इंडियन्स पंगडाक हांगाच्या अरुण जेटली स्टेडियमाचेर जाल्ले बायलांचे प्रिमियर लिगेचे एलिमिनेटर मॅचींत 5 धांवड्यांनी हारयलो.

ह्या जैता सयत रॉयल चॅलेंजर्स बंगळुरू पयले खेपे फायनलींत पावलो. आयतारा जावपी फायनलींत तो दिल्ली कॅपिटल्सा आड खेळटलो.

रॉयल चॅलेंजर्स बंगळुरून पयलीं बॅटींग करतना निर्धारीत 20 ओव्हरींनी 6 विकेटी वगडावन फकत 135 धांवड्योच केल्यो. धांवड्यांचो फाटलाव करपी मुंबय इंडियन्स एका वेळार जैता वटेन नेटान पावलां मारतालो. पूण, अखेरच्या ओव्हरींनी एका फाटल्यान एक विकेट पडिल्ल्यान ताका 20 ओव्हरींनी 6 विकेटी वगडावन 130 धांवड्यो करप शक्य जाल्यो. मुंबय वतीन मुखेली हरमनप्रीत कौरान सगल्यांत चड 33 धांवड्यो केल्यो.

मुंबय इंडियन्साची सुरवात बरी जाल्ली. ताणें पयली विकेट 27 धांवड्यांचेर वगडायली. हिली 14 बॉलांनी 15 धांवड्यो करून बाद जाली. यास्तिका भाटियान 27 बॉलांनी 19 धांवड्यो केल्यो. स्किवर ब्रंटान 17 बॉलांनी 23 धांवड्यांचें योगदान दिलें. मुखेली हरमनप्रीत कौरान 30 बॉलांनी 33 धांवड्यो केल्यो. हरनप्रीत कौर बाद जाल्या उपरांत मुंबय इंडियन्साचो डाव गडगडलो. निमाणे ओव्हरींत मुंबय इंडियन्साक जैता खातीर 12 धांवड्यांची गरज आशिल्ली. पूण, मुंबयक फकत स धांवड्योच करप शक्य जाल्यो. रॉयल चॅलेंजर्सान डब्ल्यूपीएलाच्या इतिहासांत सगल्यांत उण्या स्कोराची येसस्वी रितीन राखण केली.

ते पयलीं एलिस पॅरीन 66 धांवड्यांची खेळी केली. पूण, रॉयल चॅलेंजर्स बंगळुरूच्या एकाय बॅटराक व्हड खेळी करपाक जमली ना. पॅरीन 50 बॉलांनी 66 धांवड्यो केल्यो. तिका दुसरे वटेच्यान योग्य साथ मेळूंक ना.

मुंबय इंडियन्साच्या बॉलरांनी पावरप्लेच्या चार ओव्हरींनी बंगळुरूच्यो 24 धांवड्यांचेर तीन विकेटी घेतिल्ल्यो. मुंबय वटेन हेली मॅथ्यूजान चार ओव्हरींनी 18 धांवड्यो दिवन 2 विकेटी घेतल्यो.