भांगरभूंय | प्रतिनिधी
थिये प्रवेश करपाक मनाय; बापोल्याक मारपेट प्रकरण
म्हापशें: पायनीवाडो, थिये शुल्लक कारणा वेल्यान बापोल्याक मारपेट केल्ल्या प्रकरणांत कोलवाळ पुलिसांनी अटक केल्ल्या सागर शिरोडकाराक (36) थिये प्रवेश करचो न्हय हे अटी सयत सशर्त जामिनार सुटका केली.
25 हजार रुपया हमी रक्कम आनी तितलेच रकमेचो हमिदार, न्यायालयांत आरोपपत्र सादर जाय मेरेन थिये गांवांत प्रवेश करप ना, समान गुन्यांव करप ना, कागाळदार वा गुन्यांवा कडेन संबंदीत लोकांक धमकी वा हांयस दाखोवपाचो यत्न करप ना अशा अटीचेर दिवचल पयलो वर्ग न्यायाधीश अनुराधा आंद्रादे हांणी दुबाविताचो जामीन अर्ज मंजूर केलो. दुबाविता वतीन न्यायालयांत अॅड. विनायक पोरोब हांणी युक्तीवाद केलो.
मजगतीं, मंगळारा 12 मार्च दिसा दनपारां 12 वरांच्या सुमाराक दुबावीत आरोपी सागर शिरोडकार हाणें कागाळदार उदय सिताराम शिरोडकार (53) ह्या आपल्या स्वताच्या बापोल्याचेर कोंबड्यो आनी लांकडा चोरिल्ल्याचो आरोप करून लांकडी दांड्यान मारपेट करून जिवेशी मारपाची धमकी दिल्ली.
ह्या प्रकरणांत कोलवाळ पुलिसांनी भादंसंच्या 324, 504 आनी 506 (2) कलमा खाला गुन्यांव नोंद करून दुबावीत सागर शिरोडकार हाका बिरेस्तारा 14 वेर अटक केल्ली.
दुबावीत सागर शिरोडकार हो नावाडगो तशेंच सक्रीय आनी सरायत गुन्यांवकार आसा. ताचे आड आतां मेरेन 18 फौजदारी गुन्यांव नोंद आसात. कोलवाळ पुलिसांचे विनंती प्रमाण जिल्होधिकाऱ्यांनी फाटल्या 25 सप्टेंबर 2023 दिसा ताका स म्हयन्या खातीर उत्तर गोंयांतल्या तडिपार केल्लो. ही तडिपाराची मुजत येता त्या 24 मार्च दिसा सोंपपाची आशिल्ली. ताचे पयलींच ताणें उत्तर गाोंयांत आपल्या गांवांत थिये प्रवेश करून बापोल्याचेर हल्लो केल्लो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
