भांगरभूंय | प्रतिनिधी
म्हापशें: संगीत इव्हेंट तशेंच लग्न सुवाळो आयोजीत करपी आनी आयकर बुडोवपी राज्यांतल्या स कंपनींच्या सात आस्थापनांचेर आयकर खात्यान धाड घाली. फाटले दोन दीस हें धाडीचें सत्र सुरू आसा.
वेर्णें, दिवाडे, पणजेंतल्या मळा आनी पाटो, दोना पावला, करंजाळे आनी पर्वरे ह्या सुवातांनी आशिल्ल्या संगीत इव्हेंट कंपनींच्या आस्थापनांचेर हें धाडसत्र सुरू आसा. बिरेस्तारा फांतोडेर 4 वरांच्या सुमाराक सुरू जाल्लें हें धाडसत्र शुक्रारा रातीं उसरां मेरेन सुरू आशिल्लें.
आयकर खात्याच्या पंगडाक ह्या धाडी वेळार कांय म्हत्वाचे दस्तावेज हाताक लागल्यात. ह्या दस्तावेजांचीय पडटाळणी अधिकाऱ्यां कडल्यान सुरू आशिल्ल्याची म्हायती गोपां कडल्यान मेळ्ळ्या.
कर बुडयिल्ल्या प्रकरणांत हालींच आयकर खात्यान मडगांवां एका कसिनोचेर जाल्यार म्हापशेंच्या एका फार्मा कंपनीचेर धाड घाल्ली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
