भांगरभूंय | प्रतिनिधी
म्हापशें: झरवाडो, हणजूण्यां पुलिसांनी ड्रग्स विरोधी कारवाये खाला धाड घालून 1 लाख 10 हजारांचो एक्स्टसी टॅबलेट्स हो ड्रग्स जप्त केलो. ह्या प्रकरणांत दुबावीत आरोपी अली अझर सरकार (26, रा. हणजूण, मूळ दक्षीण दिनाजपूर अस्तंत बंगाल) हाका अटक केली.
ही कारवाय शुक्रारा रातीं 1.15 वरांच्या सुमाराक हणजूण पुलिसांनी केली. झरवाड्यार ड्रग्साचो विक्री वेव्हार जावपाचो आसा अशी म्हायती पुलिसांक मेळिल्ली. ते प्रमाण पुलिसांनी सांपळो रचलो. दुबावीत आरोपी वयल्या वेळार घडणूक थळार ड्रग्साची पुरवण करपाक येतकच पुलीस पंगडान ताका धरलो आनी झडटी घेतली तेन्ना ताचे कडेन 05.80 ग्राम वजनाच्यो एक्स्टसी टेबलेट्स हो ड्रग्स सांपडलो. ह्या ड्रग्साचें मोल 1 लाख 10 हजार रुपया इतलें आसा.
उपरांत पुलिसांनी दुबाविता आड घुंवळे वखदां प्रतिबंधक कायद्या प्रमाण गुन्यांव नोंद करून ताका अटक केली. पुलीस उपनिरिक्षक स्नेहा सावळ हांच्या फुडारपणा खाला कॉन्स्टेबल दिपेश चोडणकार, अभिषेक कांसार, कृष्णा बुडे आनी अंकीत पेडणेंकार हांणी ही कामगिरी केली. फुडलो तपास पुलीस करतात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
