भांगरभूंय | प्रतिनिधी
दक्षीण गोंयांत जातलें खासगी वैजकी महाविद्यालय
पणजी, प्रतिनिधी : खण डंपाची पावणी करपा खातीर सरकारान खण डंप धोरणाक मान्यताय दिली. खण म्हालाचे निर्गतदार तशेच खण लीजधारकांक पावणेंत वांटो घेवपाची संद मेळटली. दक्षीण गोयांत खासगी ट्रस्ट मार्फत वैजकी महाविद्यालय स्थापन करपाक मान्यताय दिल्या. आयज मंत्रालयात मंत्रीमंडळ बसका जाली. उपरांत मुख्यमंत्री डॉ. प्रमोद सावंत हांणी ही म्हायती दिली.
पयलींच्या खण कंपनींक (लिजधारकांक) डंप पावणी प्रक्रियेंत वांटो घेवपाक मेळटलो. पयलींचे लिजधारक आनी परवाना धारक निर्गतदार सोडून हेरांक डंप पावणेंत वांटो घेवपाक मेळचो ना, अशे मुख्यमंत्री सावंत हांणी स्पश्ट केलें. डंप पावणेंतल्यान सरकाराक 100 कोटी मेरेन येणावळ येतली, अशी आस्त मुख्यमंत्री सावंत हांणी उक्तायली.
दक्षीण गोयांत खासगी ट्रस्टा मार्फत वैजकी म्हाविद्यालय स्थापन जातलें. खासगी महाविद्यालय आसलें तरी सरकाराचे प्रशासकी नियंत्रण म्हाविद्यालयाचेर आसतलें. गोंयच्या विद्यार्थ्यांक काय जागे राखीव आसतले. मुख्यमंत्री, विरोधी पक्ष फुडारी हांचो आसपाव ट्रस्टात आसतलो. फुडल्या जुना मेरेन म्हाविद्यालयांत प्रवेश दिवपाक सुरवात जातली. गोंयकारांक फुकट उपचारांची सोय आसतली. सरकार एकुय पयसो म्हाविद्यालया खातीर खर्च करचो ना, अशे मुख्यमंत्री सावंत हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
