आधार अपडेट करपाची मुजत परत वाडयली

भांगरभूंय | प्रतिनिधी

नवी दिल्ली, खबरां संस्था ः युनिक आयडेंटिफिकेशन अॅथॉरिटी ऑफ इंडिया (UIDAI) हांणी आधार कार्ड फुकट अपडेट करपाची मुजत परत 3 म्हयने वाडयल्या. ही मुजत 14 मार्च आशिल्ली ता आतां वाडोवन 14 जून केल्या. पूण 14 जून उपरांत मात आधार अपडेट करपा खातीर शुल्क भरचें पडटलें. 10 वर्सां आदीं आधार कार्ड मेळिल्ल्या आनी एक फावट लेगीत अपडेट करूंक नाशिल्ल्या लोकां खातीर हो उपक्रम सुरू केला.
आधार अपडेट करपा खातीर वापरप्यांनी UIDAI, myAadhaar च्या अधिकृत वेबसायटीक भेट दिवन आपलो तपशील स्वता अपडेट करूंक शकता. हातूंत फकत डेमोग्राफिक डाटा ऑनलायन अपडेट करूं येता. तुमी स्वता आधार अपडेट करूंक शकना जाल्यार लागींच्या आधार केंद्रांत वचून तें करपाक शकतात, पूण हांगा दरेक तपशील (डेमोग्राफिकआनी बायोमेट्रीक डाटा) शकताकरपा खातीर 50 रुपया शुल्क भरचें पडटलें.
आधार ऑनलायन अपडेट करपाक तुमचो मोबायल नंबर अपडेट करचो पडटलो. नाजाल्यार आधार ऑनलायन अपडेट जावचे ना. मोबायल नंबर आधार केंद्रांतच अपडेट करूं येता. तपशील अपडेट केल्या उपरांत तुमकां सेवा विनंती क्रमांकूय मेळटलो. हाचे वरवीं तुमी तुमच्या आधारांत तपशील केन्ना अपडेट जातले तें तपासूंक शकतात.

आधार अपडेट करपाची प्रक्रिया पुराय करची…

Address Proof च्या आदारान आधारांत पत्तो कसो अपडेट करचो..

० सगळ्यांत पयलीं UIDAI myaadhaar.uidai.gov.in/ ह्या अधिकृत वेबसायटीक भेट दियात.
० हांगा लॉगीन करपाक तुमचो 12 अंकांचो आधार क्रमांक घालचो पडटलो. ते उपरांत कॅप्चा कोड घालात आनी Send OTP हाचेर क्लिक करात.
० हाचे उपरांत तुमच्या नोंदणीकृत मोबायल क्रमांकाचेर ओटीपी धाडटले. तो घालात आनी लॉगीन करात.
० आतां आधार अपडेट पर्यायचेर वचात. हाचे उपरांत Proceed to Aadhaar Update ह्या पर्यायाचेर क्लिक करात.
० ते उपरांत फुडल्या पानाचेर पत्तो निवडात आनी Proceed to Aadhaar Update ह्या पर्यायाचेर क्लिक करात.
० अशें केल्यार तुमचो सद्याचो पत्तो येतलो.
० हाचे उपरांत तुमकां अपडेट करपाक जाय आशिल्ल्या पत्त्याचो पर्याय दिसतलो.
० हांगा तुमकां तुमच्या नव्या पत्त्याची म्हायती भरची पडटली.
० हाचे उपरांत तुमकां एक दस्तावेज सादर करचो पडटलो, जातूंत तुमचो नवो पत्तो आसतलो.
० हाचे उपरांत तुमकां सकयल दिल्ल्या दोनूय चेक बॉक्सांचेर क्लिक करचें पडटलें आनी उपरांत Next पर्यायाचेर क्लिक करचें पडटलें.
० आतां तुमच्या मुखार पेमेंट पर्याय दिसतलो. थंय तुमी तुमच्या इत्से प्रमाण यूपीआय, नेट बँकिंग वा कार्डा वरवीं पेमेंट करूंक शकतात.
० पेमेंट पुराय जातकच तुमकां पावती मेळटली. हाचे उपरांत तुमचे आधार सुमार 30 दिसांनी अपडेट जातले.

दस्तावेज नासतना लेगीत तुमी तुमचो पत्तो अपडेट करूंक शकतात

तशेंच कुटुंब मुखेल्याचे परवानगेन आधारांत पत्तो ऑनलायन अपडेट करपाची सुविधाय UIDAI दिता. हाचे खाला पत्तो ऑनलायन आधार पत्तो अपडेट करपाक घरांतलो मुखेली आपल्या भुरग्याचो, जोडीदाराचो, पालकांचो पत्तो मंजूर करुं शकता. 18 वर्सां वयले कोणूय Head of family (HOF) जावंक शकता.