भांगरभूंय | प्रतिनिधी
कोलवाळ पुलिसांनी बापायचेर केलो गुन्यांव नोंद
म्हापशें: कोनीवाडो, कोलवाळे 13 वर्सा पिरायेच्या सान भुरग्यान बालेनो मोटार चलोवन एका मनशाक धपको दिवन गंभीर जखमी केलो. ह्या प्रकरणांत पुलिसांनी सान पिरायेच्या मोटार चालकाच्या बापाय आड गुन्यांव नोंद केला.
हो अपघात फाटल्या आयतारा 10 वेर सकाळीं 9.10 वरांच्या सुमाराक घडलो. जखमी विठ्ठल तारी (53, कोनीवाडो, कोलवाळे) हे सकाळीं उठून ब्रश करीत आपल्या घराच्या दारा कुशीक उबे आशिल्ले. ह्याच वेळार रस्त्यान वचपी जीए 03 झेड 6711 क्रमांकाचे बालेनो मोटारीचो धपको तांकां बसलो आनी ते रस्त्याचे कुशीक आशिल्ल्या गटाराचेर कोसळ्ळे आनी गंभीर जखमी जावन बेशुद्ध जाले. सद्या तांचेर गोमॅकाँत उपचार सुरू आसून तांची भलायकी हुस्क्याची आसा.
अपघातग्रस्त मोटार 13 वर्सां पिरायेचो सान भुरगो चलयतालो. ताका मोटार चलोवपाची योग्य अशी म्हायती नासून लेगीत ताका गाडी चलोवपाक दिली. तशेंच निश्काळजीपणान मोटार चलोवन निश्पाप मनशाची जीण घाताक घाल्ल्याच्या आरोपा खाला पुलिसांनी भादंसंच्या 279, 336, 336 आनी मोटार वाहन कायद्याच्या 3, 4 आनी 180 कलमा खाला सान पिरायेच्या मोटार चालकाच्या बापायचेर तशेंच मोटार धनी प्रकाश कोरगांवकार हांचे आड गुन्यांव नोंद केला.
फुडलो तपास पुलीस निरिक्षक विजय राणे हांच्या मार्गदर्शना खाला हवालदार अनील पिळगांवकार करतात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
