भांगरभूंय | प्रतिनिधी
खबरां संस्था
नवी दिल्लीः भारचाचो स्टार विकेटकीपर बॅट्समन ऋषभ पंत 14 म्हयन्यांच्या प्रतिक्षे उपरांत क्रिकेटच्या मैदानार खेळटना दिसतोलो. अंदूच्या आयपीएलांत खेळपा खातीर बीसीसीआयन ताका फीट घोशीत केलां. 2022 वर्सा ताचे कारीक अपघात जाललो. ते उपरांत ताका परत फीट जावपा खातीर मेहनत घेवपी पडली. मंगळाराक बीसीसीआयन खेळगड्यांचें वैजकी अपटेड दिले. तातूंत ऋषभ फीट आशिल्ल्याचें राष्ट्रीय क्रिकेट अकादमीन (एनसीए) जाहीर केलें. हाका लागून तो आयपीएलांत खेळटलो.
आपणे जेन्ना आयपीएलांत पदार्पण केल्लें तेन्ना जशें दिसतालें तशेंच आतां दिसता, चेंपण आसा पूण उमेदूय आसा अशें ऋषभाल फीट म्हणून घोशीत केल्या उपरांत सांगले. म्हाका परत क्रिकेट खेळपाक मेळप हें अजापा परस कमी ना. म्हजे बरें मागपी, चाहत्यांक आनीच चड करून बीसीसीआय आनी एनसीएतल्या कर्मचाऱ्यांचो हांव उपकारी आसा. तांचो मोग आनी तेंक्यान म्हाका बळगे दिलें अशें ताणे सांगलें.
ऋषभ आपल्या दिल्ली कॅपिटल्स पंगडांत खेळटलो. ताका परत कॅप्टन करप काय ना हाचो निर्णय मुखेल कोट रिकी पॉटिंग भारतांत आयल्या उपरांत घेतले. म्हज्या दिल्ली कॅपिटल्सा वतीन खेळपाक हांव उत्सूक आसा. आयपीएल सर्त म्हाका खूब आवडटा. आमचो संघ धनी आनी सहाय्यक कर्मचाऱ्याचें समर्थन म्हाका दरेका पांवड्यार मेळ्ळां. आयपीएलाक 22 मार्चा सावन सुरवात जातली. दिल्ली कॅपिटल्स आपली पयली मॅच 23 मार्चाक मोहालींत पंजाब किंग्जां आड जातली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
