भांगरभूंय | प्रतिनिधी
लखनौ, खबरां संस्था ः उत्तर प्रदेश पुलीस भरती परिक्षेचो पेपर सुमार 1000 उमेदवारांच्या हाजिरेंत गुरुग्रामांतल्या मानेसर रिसॉर्टांत आशिल्लो. ‘पेपर लीक करपी गटा’न ह्या पेपरा खातीर उमेदवारां कडेन दरेकीं 7 लाख रुपयांचो सौदो केल्लो. उमेदवारांनी आपलीं कागदपत्रां ह्या गटा कडेन घाणात दवरिल्लीं. हो खुलासो जाणें उमेदवारांक कागदपत्रां पावोवपाक मजत केल्ली तो आरोपी महेंद्र शर्मा हाणे केला. हरियाणाच्या जिंदांतल्या महेंद्राक युपी एसटीएफान अटक केल्या. पळून गेल्लो मुखेल आरोपी विक्रम पहल आनी हेर आरोपी मोनू शर्मा, रवि अत्री, अभिषेक शुक्ल हेय फरारी आसात.
एसटीएफ मेरठ (फील्ड युनिट) एएसपी बृजेशकुमार सिंह हांच्या म्हणण्या प्रमाण, विक्रम दिल्ली पुलिशेंत हवालदार आसा, जाल्यार रवी हाचे आदीं पेपर लीक प्रकरणांत आरोपी आशिल्लो. विक्रमान ताका एक ते दोन लाख रुपया दिल्याचे महेंद्रान मान्य केलां. ताका हांयस दाखोवन 15 फेब्रुवारीक रिसॉर्टांत व्हेलो. थंय 300- 400 उमेदवार पयलींच हाजीर आशिल्ले. 16 फेब्रुवारीक आरोपी गौरव चौधरी 10- 12 बशींतल्यान सुमार 700 उमेदवारांक घेवन आयलो. कांय वेळा उपरांत विक्रम पेपर आनी उत्तर पत्रिका घेवन आयलो. सगल्या उमेदवारांक ताणें प्रस्न- उत्तर पत्रकां दिलीं. 17-18 फेब्रुवारीक तीन शिफ्टांची परिक्षा बरी गेली, पूण 18 तारखेच्या सांजवेळार चवथे शिफ्टीचो पेपर सोशल मिडियाचेर लीक जाले उपरांत बोवाळ जालो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
