भांगरभूंय | प्रतिनिधी
नवी दिल्ली, खबरां संस्था ः मनशांचेर सुण्यांन हल्लो करप घडणूको वाडत आसा. सुण्यांच्या हल्ल्यांत कितलेशेच जाणाक मरण लेगीत आयला. देखून सरकारान 23 धोक्याच्या सुण्यांच्या जातींचेर बंदी घालपाचो निर्णय घेतलां. हल्लो करपी सुण्यांचे आयात, पैदास आनी विक्रेचेर बंदी घालपाचे केंद्र सरकारान राज्यांक निर्देश दिलां. रॉटविलर, पिटबूल, टेरियर, वुल्फ डॉग, मास्टिफ अशा २३ जातींच्या सुण्यांचो हे वळेरेंत आस्पाव आसा. हे संबंदी केंद्र सरकारान राज्य सरकारांक पत्र बरयलां. पशुपालन आयुक्ताच्या अध्यक्षतेखाला स्थापन केल्ले तज्ञ समितीनय अशा जातींच्या सुण्यांच्या आयातीचेर बंदी घालपाची शिफारस केल्ली. ते उपरांत हो निर्णय घेतला.
खंयच्या सुण्यांच्या जातीचेर बंदी?
पिटबूल, टेरियर, टोसा इनू, अमेरिकन स्टॅफोर्डशायर टेरियर, फिला ब्राझीलियानो, डोगो आर्जेटीनो, अमेरिकन बुलडॉग, बॉसबोएल, कांगल, सेंट्रल एशियन शेफर्ड डॉग, कॉकेशियन शेफर्ड डॉग, दक्षीण रशियन शेफर्ड डॉग आनी टोरना ह्या सुण्यांचे प्रजनन आनी विक्री करपाक बंदी आसा. ह्या सुण्यांक घरांत पोसपाक मेळचें ना. ह्या सुण्यां मदीं सरप्लॅनिनॅक, जपानी टोसा, मास्टिफ्स, रॉटविलर, टेरियर, रोडेशियन रिजबॅक, वुल्फ डॉग्स, कॅनारियो, अकबाश, मॉस्को गार्ड, केन कोर्सो आनी बँडॉग हांचो आस्पाव आसा.
सुण्यांच्या हल्ल्या संबंदी दिल्ली न्यायालयांत याचिका दाखल जाल्ली. उपरांत 6 डिसेंबर 2023 दिसा दिल्ली उच्च न्यायालयान हे प्रकरणांत समिती घडोवपाचे निर्देश दिले. हे समितींत तज्ञ आनी पशुकल्याण संस्थांचे प्रतिनिधी आशिल्ले. हो निर्णय ह्या प्रकरणाच्या अहवाला उपरांत दिला.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
