भांगरभूंय | प्रतिनिधी
नागपूर, खबरां संस्था : शासकीय वैजकी महाविद्यालय आनी सुपरस्पेशालिटी हॉस्पिटलांत एक २५ वर्सां पिरायेची तरणाटी किडनी डिसऑर्डरच्या दुयेंसा खातीर आयली. विवीध वैजकी तपासणे उपरांत तिका हो विकार एके नवे कंपनीच्या तोंडाक लावपाची क्रिमीक लागून जाल्ल्याचें कळ्ळें. १४ मार्चाक संवसारीक किडनी डिसऑर्डर दीस आशिल्ल्यान त्या निमतान घेतिल्लो हो नियाळ.
नागपुरांतल्या सुपरस्पेशालिटी हॉस्पिटलांतले ओपीडींत २०२३ वर्साच्या जुलयांत एक २५ पिरायेची चली आयली. तिच्या दोनूय पांयांक म्हयनोभर सूज आशिल्ली. ती फुडें सरून मांडयो आनी पोटाकूय सूज येताली. डॉक्टरान तिची तपासणी केली. तातूंत नेफ्रोटीक सिंड्रोमचो दुबाव आशिल्लो. ते प्रमाण दुयेंतीची मुता सयर विंगड विंगड दुयेंसांची तपासणी केली.
दुयेंतीच्या मुतांतल्यान प्रथिनां गळपाचें प्रमाण वट्ट १३ ग्रॅम जालें. ही गळती सामान्य तरेन ०.३ ग्रॅम आसता. दुयेंतींच्या किडणीची बायोप्सी केल्या उपरांत निल १ पॉझिटिव्ह मेम्ब्रेनस नेफ्रोपॅथी दुयेंस सांपडलें. हो किडनीचो कॅन्सर आसता. हें दुयेंस हर्बल वखदांचो वापर आनी संबंदीत हेर वखदां कडेन आसा. हें दुयेंस सामान्य दुयेंतीं मदीं दिसना.
संबंदीत दुयेंसाचो इतिहास जाणून घेतलो तेन्ना दुयेंतीन सुमार दोन म्हयन्यां सावन बाजारांतल्यान एक क्रिम हाडून लावपाक सुरू केल्ल्याचें कळ्ळें. ह्या वेळार दुयेंतीक बेगीन ही क्रिम वापरपाचें बंद करपाक सांगलें. हे क्रिमीच्या घटकांची तपासणी केली तेन्ना डॉक्टरांक तातूंत बरे वायट घटक दिसून आयलें. उपरांत रोखडेच दुयेंतीचेर उपचार सुरू जाले. दुयेंतीन वखदां आनी उपचाराक बरे तरेन सहकार्य केल्ल्यान ६ म्हयन्यांनीच ती बरी जाली.
मजगतीं, हे घडणुकेक लागून बाजारांत विकपी खंयच्योय सुंदर जावपाक तोंडाक लावपाच्यो वस्तू घेवपाचेर प्रस्न निर्माण जाला.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
