भांगरभूंय | प्रतिनिधी
नागपूर, खबरां संस्था : नागपूर शारांतल्या बेलतरोडी पुलीस स्टेशनाच्या वाठारांतले रचना गृह निर्माण सहकारी संस्थेंत काम करपी तरणाट्याच्या खुनाची घडणूक उजवाडाक आयल्या. कुटुंबीक वादांतल्यान एका तरणाट्यान आपलेच भयणीचो कुकूम पुसलो. रागान ताणें आपल्याच भावोजीक मारून उडयिल्ल्याचें उक्ताडार आयलां. भावोजीचो खून करतकच दुबावीतान पळ काडलो. पुलीस ताचो सोद घेतात. रवी कहार अशें मरण आयिल्ल्याचें नांव, तर मेवणो अरुण अन्नू बनवारीन ताका मारलो.
रवी आनी अरूण हे दोगूय मूळ मध्यप्रदेशांतले. शिवणगांव पुनर्वसन ले-आउट हांगा गटार पायप लायनीचें काम करपा खातीर ते नागपुराक आयिल्ले. मात घडणुकेच्या दिसा अरुण आनी रवी हांचे मदीं कांय कारणांक लागून झगडें पेटलें. वाद वाडलो आनी रागान अरूणान भावोजीक लाकडी दांड्यान बरोच मार दिलो. तातूंत तो गंभीर जखमी जालो. उपरांत ताका हॉस्पिटलांत व्हेलो. मात दोतोरांनी ताका मरण आयिल्ल्याचें सांगलें. आरोपीचो सध्या पुलीस सोद घेतात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
