भांगरभूंय | प्रतिनिधी
लंडन, खबरां संस्था ः इंग्लंडांतल्या राष्ट्रीय भलायकी सेवेंतल्या दोतोरांचो उणाव भरुन काडपा खातीर भारतांतल्यान दोन हजार दोतोर धाडटले. हे खातीर भारतांतल्या णव मुखेल शारांतल्या मुखेल हॉस्पिटलांनी प्रशिक्षण केंद्रां सुरू केल्यांत. हीं शारां म्हळ्यार मुंबय, गुरूग्राम, नागपूर, इंदौर, चेन्नय, दिल्ली, कालीकत, बेंगळुरू आनी म्हैसूर. भारतीय दोतोरांच्या पयल्या गटाक फास्ट ट्रॅक पीजी कार्यावळी खाला एनएचएस वरवीं प्रशिक्षण दितले.
सध्या ब्रिटनांत 30,000 परस चड भारतीय दोतोर काम करतात. फास्ट ट्रॅक पीजी कार्यावळी उपरांत फुडल्या धा वर्सांत भारतीय दोतोरांचो आंकडो दुपेटीन वाडपाची शक्यताय आसा. ब्रिटनांतल्या साउथ वेल्स, बोल्टन आनी प्लायमाउथ ह्या प्रतिश्ठीत विद्यापिठांनी भारतांतल्यान येवपी दोतोरां खातीर खाशेली प्रशिक्षणाची वेवस्था केल्या अशें एनएचएसचे आदले मुखेल कार्यकारी सायमन स्टीव्हन्स हांणी सांगलें.
एनएचएसान इंग्लंडांत 23 वरिश्ठ दोतोरांचो पंगड तयार केला. जे भारतांत येवन पदव्युत्तर दोतोरांक खासा प्रशिक्षण दितले. नागपूरच्या किंग्सवे, चेन्नयतल्या सिम्स, गुरूग्रामांतल्या पार्क, फरीदाबादच्या मेट्रो, कालीकतांतल्या ॲस्ट आनी इंदौरांतल्या अरबिंदो हॉस्पिटलांतल्या दोतोरांची नांवां प्रशिक्षकांनी दिल्यांत.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
