भांगरभूंय | प्रतिनिधी
प्रदर्शनांतल्यान वस्तू विक्री; सरकाराच्या ई बाजारांतूय नोंदणीची प्रक्रिया सुरू
भांगरभूंय । अजय लाड
मडगांवः चडशे सगळेच दर दिसा जेवणांत नाल्ल वापरतात. दर दिसा मेळपी नाल्लाच्यो कट्ट्यो भायर उडयतात वा न्हाणयेंत उज्यांत घालतात. पूण नुवेंची मीता नायक हे बायलेन ह्योच कट्ट्यो आनी माडाच्या हेर घटकां पासून कप, कुलेरां, फ्लावरपॉट, सोबेच्यो वस्तू तयार करून अर्थीक स्वयंपूर्णते वटेन पावलां मारल्यांत. नोकरेच्या सोदांत भोंवप्यांनी कलेच्या माध्यमांतल्यान स्वयंरोजगारांतल्यो संदी निश्चीत मेळटात, हे तिणें दाखोवन दिलां.
माडाक कल्पवृक्ष म्हणटात. माडाच्या चुडटा सयत दरेका भागाचो कसलो ना कसलो वापर करतात. नाल्लाची सोय दर दिसा वापरतात. तेचवरी कट्ट्यो, चुडटां, माड मारलो जाल्यार ताचे वाशे करतात. हाचे भायर ह्या घटकांचो कल्पकतेन वापर करून रोजगाराची निर्मिती लेगीत जाता.
नुवे देवोट्टेची मीता नायक ही कट्ट्यां पासून वस्तू तयार करता. कसलेंच प्रशिक्षण घेवंक नाशिल्ली मीता नायक हिका आदींच्यानूच विवीध वस्तू तयार करपाचो छंद आशिल्लो. पूण तातूंतल्लयान रोजगाराची निर्मिती जातली, हें मात तिका खबर नाशिल्लें. गांवांत आयोजीत एका प्रशिक्षणांत तिका कट्यां पासून वस्तू करपाचें प्रशिक्षण मेळ्ळें. ते उपरांत फाटल्या पांच वर्सां सावन कट्ट्यां पासून विवीध वस्तू तयार करून ती विकता.
घरसंवसार सांबाळटनाच घरांत रावुनूच मेळिल्ल्या वेळांत केल्ल्या वस्तूंचे विक्रींतल्यान पयशे मेळपाक लागले उपरांत मीता हाणें ह्या कामाक चड वेळ दिवपाक सुरवात केली. मजगतीं, तिणें केल्ल्या वस्तूंची मागणीय वाडली. मीता नायक हांणी आतां मेरेन माडाचे वाशे केले उपरांत उरिल्ल्या कुडक्याचे कुलेरां आनी कट्ट्याचे दवले तयार केल्यात. कट्ट्यां पासून टेबल लॅम्प, चिमणीची प्रतिकृती, कानांतलीं रिंगां, आयदना, घरांतल्यो सोबेच्यो वस्तू, पेन स्टॅण्ड आशिल्लो लॅम्प, झुंबर, उजवाती लावपाचो स्टॅण्ड, नॅचरल वायन बॉटल, फ्लावर पॉट, जेवणाचे बावल, कपां, च्यायेची कपां अश्यो विवीध वस्तू तयार केल्यात.
मशिना बदला हातान वस्तू करपाचेर भर
कट्ट्यांच्यो विवीध वस्तू केले उपरांत पॉलीश करप, आकार दिवपा खातीर सुमार 20 हजार रुपया खर्च करून ग्रायंडर, ब्रेंच मशिनां घेतल्यांत. पूण मशिनान काम केल्यार वस्तूचें तापमान वाडटा आनी ताका तडो वचपाचो भंय आसता. हे खातीर हातान वस्तू करपाचेर आपूण भर दिता, अशें मीता नायक हांणी सांगलें.
प्रदर्शनांत वस्तूंक चड प्रतिसाद
गोंय सरकारा कडल्यान आयोजीत करतात तो लोकोत्सव, सरस अश्या हस्तकला कारागिरां खातीरच्या प्रदर्शनांचो चड फायदो जाता. आप मजत गटाच्या माध्यमांतल्यान प्रदर्शनांत वांटो घेता. प्रदर्शनांत विवीध वाठारांतले लोक येतात. ते वस्तू पळयतात आनी खरेदी करतात. इंन्टाग्रामाचेरुय mitart 74 ह्या नांवान प्रोफायल आसा. सरकाराच्या ई बाजार माचयेचेरूच नोंदणी खातीर फोटो आनी म्हायती दिल्या. नोंदणीचें काम चालू आसा, अशें मीता नायक हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
