भांगरभूंय | प्रतिनिधी
म्हापशें येरादारी पुलिसांची रेंट अ बायक, कॅब वेवसायिकांक सुचोवणी
भांगरभूंय । प्रतिनिधी
म्हापशें: पर्यटकांक गाडयो भाड्यान दितना येरादारी नेम पाळपा सयत ते दर्जेदार आयआसआय मार्क आशिल्लींच हॅल्मेटां घालतले, हाची खबरदारी घेयात. तांकां येरादारी नेमां विशीं जागृत करात, अशी सुचोवणी म्हापशें येरादारी पुलीस निरिक्षक मार्लन डिसोझा हांणी शारांतल्या रेंट अ बायक आनी रेंट अक कॅब वेवसायिकांक केली.
हालींसराक रेंट अ बायक आनी रेट अ कॅब मोटारींचो रस्तो अपघातांतलो आस्पाव वाडला. हे फाटभुंयेर पुलीस खात्यान येरादारी पुलिसांक आपापल्या वाठारांतल्या वेवसायिकां कडेन संवाद सादपाची सुचोवणी केल्या. तशेंच जनजागृती पत्रकां उपलब्ध केल्यांत. ते प्रमाण सोमारा 11 मार्चाक म्हापशें येरादारी पुलिसांन शारांतल्या रेंट अ बायक आनी रेंट अ कॅब धनयांची बसका घेवन संवाद सादलो. पुलीस निरिक्षक मार्लन डिसोझा हांचे अध्यक्षते खाला ही बसका जाली. ह्या वेळार हाजीर आशिल्ल्या वेवसायिकांक येरादारी नेम पत्रकां वांटलीं.
येरादारी पुलीस निरिक्षक मार्लन डिसोझा हांणी सांगलें, सध्या रस्तो अपघात वाडल्यात. रेंट अ बायक आनी रेंट अ कॅब गाडयांचो तातूंत व्हड प्रमाणार आस्पाव आशिल्ल्याचें दिसता. ते खातीर ह्या गाडयांचो वेवसाय करप्यां मदीं येरादारी नेमां विशीं जागृती करपा खातीर ही बसका आशिल्ली.
संबंदितांक पुलिसां वतीन मार्गदर्शक सुची आशिल्लीं पत्रकां वांटलीं. तातूंत रेंट अ बायक आनी रेंट अ कॅब धनयांनी गिरायकांक येरादारी नेमांक खरपणान पाळो दिवपाक जाय, हाची म्हायती दिवपाची गरज आशिल्ल्याचें म्हणलां. पर्यटकांक दर्जेदार हॅल्मेटां दिवपाचीय सुचोवणी केल्या. तशेंच पर्यटना खातीर येवपी पर्यटकांक येरादारी नेमांचें भान दवरून सुटयेचो आनंद घेवपा संबंदांत जनजागृती करपाचीय सुचोवणी हे बसकेंत केल्ल्याची म्हायती डिसोझा हांणी दिली. वेवसायीक जयेश राऊत हांणी सांगलें, पयलेच खेपे येरादारी पुलिसांनी अशे तरेची आमचे खातीर जागृतीची कार्यावळ घडोवन हाडल्या. आमी पुलिसां वांगडा रस्तो अपघात आडावपाक मजत करतले. गिरायकांनी गाडी चलयतना खबरदारी घेवप आनी नेम पाळचे हे खातीर जागृती करतले.
10 नेमांची मार्गदर्शक वळेरी
येरादारी पुलिसां वतीन भाड्यान गाडयो दिवपी वेवसायिकां खातीर रस्तो सुरक्षे खातीर 10 नेमांची मार्गदर्शक वळेरी तयार केल्या. तातूंत गाडी चलोवप्यान हेल्मेट घालप, सीट बेल्ट वापरप, वेग मर्यादा पाळप, गाडी चलयतना मोबायलाचो वापर करचो न्हय, सोरो पियेवन गाडी चलोवची न्हय, ट्रिपल सीट गाडी चलोवची न्हय, येरादारी सिग्नलां पाळची, अश्या नेमांचो आस्पाव आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
