भांगरभूंय | प्रतिनिधी
विजय सरदेसायः सार्दीनाक उमेदवारी दिल्यार फुडली भुमिका जाहीर करतलों
भांगरभूंय । प्रतिनिधी
मडगांवः काँग्रेसीचे प्रभारी माणिकाराव ठाकरे हांची भेट घेवन चर्चा केल्या. हे आदीं इंडिया आघाडी केल्या. ते बसकेक आपूण वचूंक नाशिल्लो. आतां काँग्रेसीन चर्चे खातीर आपयिल्ल्यान गेलों आनी जे सांगपाचें तें सांगलां. फ्रान्सीस सार्दीन वा कोणाचें उलोवन कांयच फायदो ना. लोकसभा वेंचणुकेक उमेदवार काँग्रेस दितलो. जिखल्यार ते जिखतले. तांकां जाय ताका दिवंदी. जो सल्लो तांकां दिवपाचो आसा तो दिला. हे फुडलो निर्णय काँग्रेसीन घेवपाक जाय. तांकां जाय त्या उमेदवाराक तिकेट दिवची. तांणी सार्दीन हांकां तिकेट दिल्यार ते उपरांत फुडली भुमिका जाहीर करतलों, अशें गोवा फॉरवर्डाचे अध्यक्ष विजय सरदेसाय हांणी सांगलें.
फातोडेडें मतदारसंघांत एका पयशाचो निधी खासदार फ्रान्सीस सार्दीन हांणी दिवंक ना. काँग्रेस आनी गोवा फॉरवर्डाचे आघाडेक सार्दीन हांणीच विरोध केल्लो. काँग्रेसीक मतां मारचीं न्हय, अशें सांगपी सार्दीन हांचो व्हिडियो लेगीत आसा, अशें सरदेसाय हांणी सांगलें.
फातोड्ड्यां आगळी वाठारांत 25 लाखांच्या कामांक सुरवात आमदार विजय सरदेसाय हांचे हाजिरेंत केली. ह्या वेळार सरदेसाय उलयताले. फातोडेडें मतदारसंघांत रस्त्यांचीं कामां जाल्यांत. घाणयाऱ्या उदकाच्या पायपलायनीचीं आनी राखणे वण्टींचीं कामां चालू आसात. वेंचणुकेची आचारसंहिता खंयच्याय खिणाक लागू जावं येता. ताका लागून ज्या कामांच्यो निविदा जारी जावन वर्क ऑर्डर काडल्यात, तीं कामां सुरू केल्यांत. फातोड्ड्यां शेतजमनींतल्या बांयांचेर सोलप पंप बसयतले. शेतकारांक गरजेच्यो त्यो सुविधा उपलब्ध करून दिवपाचो यत्न आसा. मडगांव पालिके वतीन एकूय कामाची निविदा काडिनाशिल्ल्यान खूबश्या प्रभागांतलीं कामां उरल्यांत. ताका लागून त्या प्रभागांतल्या कामांचेर लक्ष दितले, अशें सरदेसाय हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
