बाजारांतले फोडणेंत मिरसांगेची तिखसाण पडलीं माल, मात लसणीन केलें सालवार
भांगरभूंय | प्रतिनिधी
पणजी, बातमीदार: आयजचे म्हारगायेंत सामान्य लोकांचे हाल जातना पळोवपाक मेळटात. आदल्या काळार एका रुपयान बुसकोभर मेळपी मिरसांग आतां चिमटीमारून लेगीत मेळप कुस्तार जालां. सध्या पणजेच्या बाजारांत एक किलो मिरसांगाचो दर १२० रुपया जाला. फाटल्या सप्तकांत १०० रुपया किलो आशिल्ल्या मिरसांगांचेर सध्या २० रुपया वाडल्यात. मात ४०० रुपया किलो आशिल्लें लसणाचें दर सध्या देंवून ३०० रुपया किलो जालां. लसणाचेर १०० रुपया उणे जाल्ल्यान लोकांनी समाधान उक्तायलां.
कर्नाटकांतल्यान गोंयच्या बाजारांत येवपाचें लिंबूचें प्रमाण उणें जाल्ल्यान लिंबूची किंमत वाडल्या. सध्या ७ रुपयांनी १ लिंबू बाजारांत मेळटा. फुडल्या कांय म्हयन्यानीं लिंबुचें दर आनीक वाडपाची शक्यताय आसा. तशेंच आडसरूय सध्या ५० ते ६० रुपयांनी एक मेळटा.
भारतान भायल्या देशांनी कांदो धाडपाचें बंद केल्ल्यान सध्या पुराय भारतांत तशेंच गोंयच्या बाजारांनी कांद्याचें दर देवलां. तशेंच बटाट, टमाटांचेंय दर देंवलां.
आतां फलोत्पादन गाड्यां वयल्या किमतींचेर लक्ष घालुया
फलोत्पादन मंडळाच्या गाड्यांचेर कांद्याचें दर २८ रुपया किलो आसा. फाटल्या सप्तकांत कांदो, बटाट आनी टमाट ४० रुपया किलो आशिल्लें. जाल्यार आयतारा हो दर देंवून कांदो, बटाट आनी टमाटांची किंमत ३० रुपया किलो जाल्या. फाटल्या सप्तकांत वांयगें ६० रुपया किलो आशिल्लें तें सध्या ८० रुपया किलो विकतात. जाल्यार गाजराचें दर २० रुपयांनी देंवलां. सध्या गाजर फलोत्पादन गाड्यांचेर ६० रुपया किलो विकतात. घोसाळ्याचें दर १० रुपया देंवलां. ताची किंमत ७० रुपया किलो जाल्या. भेंडे, शिमला मिरची, वालपापडेची किंमत फाटल्या सप्तका प्रमाण ८० रुपया किलोचेर थीर आसा. तशेंच फ्लावर ३० ते ३५ किलो, दुदी ४० रुपया, कोथमीर, मेथी आनी शेपूची चुडी २० रुपयांनी, जाल्यार पालक १० रुपया चुडी विकतात. आल्याचें दर वाडून १८० रुपयांचेर पावलां. तर हो आसलो सध्याचो बाजार दर.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
