भांगरभूंय | प्रतिनिधी
पेडणें, प्रतिनिधी: मोरजे पंचायत वाठारांतल्या दाभोलकार वाड्या वयल्या मुखेल रस्त्या कुशीक आशिल्ल्या आनंदी अनंत मिनी सुपर मार्केट वायन स्टोअरांत जाली चोरी. चोरांनी प्रवेश करून २ लाखां परस चड रक्कम आनी दोन लाखा परस चड सामान चोरून व्हेल्ल्याची घडणूक आयज सकाळीं ११ वरांचेर घडली.
हे विशीं चड म्हायती प्रमाण, आनंदी अनंत मिनी सुपर मार्केट वायन स्टोअर काल रातीं एका वरांचेर बंद केल्लें. धनयान उपरांत सकाळीं येवन पळयल्यार चोरांनी वयले वटेनच्यान भितर प्रवेश करून सीसीटीव्हीचीं सगळीं यंत्रणां फारायलीं. तशेंच २० हजारां परस चड रक्कम, कांय म्हारग सोर्याच्यो बाटल्यो मेळून सुमार २ लाखां परस चड सामान चोरलें. धनयान ही चोरी सकाळीं जाल्ल्याचो अदमास उक्तायला. ह्या मिनी सुपर मार्केटच्या मुखार आशिल्लें रेस्टॉरंट फांतोडेर पांच मेरेन उक्तें आशिल्लें. तांकांय चोरांनी कसलीच सुलूस लागपाक दिवंक ना.
मिनी सुपर मार्केटा कुशीक कांय माड आसात. माडार चडून चोर पयले माळयेर देंवलो आनी वयले माळयेर आशिल्लीं दारां फोडून सकयल देंवलो. सुपर मार्केटांत प्रवेश करतना तांणी थंय लागिल्ले हलके फर्मायक कार्डबोर्ड कापले आनी भितर सरलो. उपरांत थंयचें सामान आनी पयशे चोरून व्हेले.
हे विशीं पुलिसांक म्हायती मेळटांत पुलीस थंय आयले. मिनी मार्केटा कुशीक आनी एक मिनी मार्केट आसा ताचेर लागिल्ल्या कॅमेर्यांत वेवस्थीत कांय दिसूंक ना.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
