भांगरभूंय | प्रतिनिधी
रेल्वे प्रशासन प्रवाशां खातीर चड सुविधायो उपलब्ध करून दिवपाचो यत्न करता आसतना तिकेट नाशिल्ल्या प्रवाशांचो आंकडो वाडला. फुकट प्रवाशांक लागून रेल्वेचे तिजोरेंत १५७ कोटी मेरेन येणावळ जमल्या. मुंबयत अस्तंत रेल्वेचेर टिकेटी बगर येवपी प्रवाशांक आडावपा खातीर स्टेशनांचेर, पुलांचेर फोर्टेस तिकेट तपासणे सयत रेल्वेंतूय तिकेट तपासणी मोहीम खर केल्या. हे मोहिमेक लागून फाटल्या धा म्हयन्यांत फुकट प्रवाशांचेर १५७ कोटी रुपया दंड वसूल केला.
एक लाख लोक तिकेटी बगर
फेब्रुवारी म्हयन्यांत मुंबयच्या उपनगरांतल्या वाठारांनी सुमार १.०२ लाख प्रवासी तिकेट नासतना मेळ्ळे. वताची खरसाण वाडिल्ल्यान एसी लोकलांत तिकीट नाशिल्ल्या प्रवाशांचो आंकडो व्हडा प्रमाणांत वाडटा. मुंबय लोकलाचेर फुकट प्रवास करपी लोकां कडल्यान रेल्वे प्रशासनान ६.४३ कोटी रुपया दंड वसूल केला. फाटल्या वर्साचे तुळेंत अंदूं जानेवारी ते फेब्रुवारी ह्या काळांत ५६ हजार चड तिकेट नाशिल्ले प्रवासी धरल्यात. हाका लागून दंडाची रक्कम ३५ टक्क्यांनी वाडल्या.
धा म्हयन्यांत १५७.१२ कोटी रुपया दंड
फाटल्या धा म्हयन्यांत रेल्वेन दंड म्हणून १५७.१२ कोटी रुपया एकठांय केल्यात. ह्या काळांत दंडाची रक्कम फाटल्या वर्सा परस ३५ टक्क्यांनी वाडल्या. फेब्रुवारी म्हयन्यांत सुमार १.०२ लाख तिकेट नाशिल्ले प्रवासी मेळ्ळ्यात. ह्या प्रवाशांचेर ६.४३ कोटी रुपया दंड वसूल केला.
फाल्यां रेल्वेचें काम सुरू
मंगळारा १२ मार्चाक विंगड विंगड रेल्वेच्या कामांचें उक्तावण जातलें. ते भायर ९०० परस चड कृती भूंयपूजन आसतली. लोकार्पण आनी भूंयपूजन महाराष्ट्रांतल्या ५०० सुवातींनी जातली. पुण्यांतल्या लातूर हांगा म्हत्वाचे प्रकल्प हातांत घेतल्यात. आतां गाडयांचो आंकडोय वाडटलो. सेंट्रल रेल्वेचेर कलबुर्गी स्टेशन सावन विश्वेश्वरय टर्मिनस मेरेन आनीक ‘एक वंदे भारत’ रेल्वे सुरू जातली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
