भांगरभूंय | प्रतिनिधी
म्हापशें, प्रतिनिधी ः मोन्तेरोवाडो- हणजुण्यां स्टारको जंक्शनाचेर जाल्ल्या अपघातांत मूळ आंध्रप्रदेशाची टी. पुजिथा (27) हिका मरण आयलें. तें ‘व्हुपर हॉस्टेल’ नांवाच्या गेस्ट हावसांत काम करताले. ‘रेंट ए बायक’ स्कुटरीन राखणे वण्टीक धपको दिलो आनी उपरांत तें रस्त्यार उसळून पडले आनी फाटल्यान येवपी स्कोडा गाडयेच्या टायरां पोंदां चिड्डलें आनी जाग्यारुच ताका मरण आयलें.
हणजुण्यांच्या स्टारको जंक्शनाचेर सकाळीं सुमार पांच वरांचेर हो अपघात जालो. ‘रेंट ए बायक’ वयल्यान हॉस्टेलांतल्या वेगवेगळ्या राज्यांतल्या 5 पर्यटकां वांगडा पुजिथा वागातोर भोंवपाक गेल्ले. पुजिथा हरियाणाचो पर्यटक शिवम उपलक्ष (26) हाच्या वांगडा स्कुटरीर फाटल्यान बशिल्ले. सकाळीं पांच परांचेर हे स जाणा वागातोरांतल्यान हॉस्टेलाचे वटेन येताले. स्टारको जंक्शनाचेर अशीर रस्तो आशिल्ल्यान शिवमाचो स्कुटरी वयलो ताबो गेलो आनी स्कुटरीन रस्त्या कुशीक आशिल्ल्या घरांच्या राखणे वण्टीक धपको दिलो. हाका लागून पुजिथा उसळून रस्त्यार पडले आनी फाटल्यान येवपी स्कोडा गाडयेच्या टायरां पोंदां चिड्डलें आनी ताका जाग्यारुच मरण आयलें. जाल्यार स्कुटर चलोवपी शिवम हाका किरकोळ दुखापत जाल्या. ही कार मुळ हैदराबादांतल्या समरीन बी. (रा. हणजूणा) हांची आसा. ही कार बायल चलयताली.
हणजूण्यां पुलिसांनी अपघातांचो पंचनामो करून कुड पोस्टमार्टमा खातीर धाडल्या. पुलीस उपनिरिक्षक साहिल वारंग आनी हवालदार राजेंद्र पाटील हांणी घडणुकेचो पंचनामो केलो. पुलीस फुडली चवकशी करतात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
