भांगरभूंय | प्रतिनिधी
पेडणें, प्रतिनिधी : मांद्रेंच्या सरपंच पदार बाळा उर्फ प्रशांत नायक हांची विरोधा विणें निवड जाली. सरपंच अमित सावंत हांणी पंदरा दिसां आदीं पदाचो अलिखीत करारा प्रमाण राजीनामो दिल्लो. ताका लागून हें पद रितें आशिल्लें.
सोमारा पंचायत मंडळाची विशेश बसका घेवन सरपंच पदा खातीर वेंचणूक घेतली. तेन्ना बाळा उर्फ प्रशांत नायक हांचो एकूच अर्ज सरपंच पदा खातीर आयल्या उपरांत तांची विरोधा विणें निवड जाली. ह्या वेळार उपसरपंच तारा हडफडकार, आदले सरपंच तशेंच पंच वांगडी अमित सावंत, पंच वांगडी चेतना पेडणेंकार, पंच किरण सावंत, पंच राजेश मांजरेंकार, पंच मिंगेल फर्नांडीस, पंच रोबर्ट फर्नांडीस, राॅशल फर्नांडीस आनी हेर हाजीर आशिल्लीं.
सरपंच प्रशांत नायक हांणी सरपंच पदार आपली विरोधा विशें निवड करून पुराय पंचायत मंडळान जो आपल्याचेर विश्वास दवरला ताका आपूण पात्र थारतलों. तशेंच इकराय प्रभागांची उदरगत करतलों. उदरगतीचे बाबतींत कसलेच तरेचें राजकारण जावचें ना. सरकार आनी आमदार जीत आरोलकार हांच्या सहकार्यान उदरगत करतलों अशें तांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
