भांगरभूंय | प्रतिनिधी
उदकाचें प्रदुशण, कामगारांचो उणाव, वाडिल्लें लुकसाण, वाडिल्ली वेवसायिकता कारणीभूत
भांगरभूंय । अजय लाड
मडगांवः सुमार 20 वर्सां आदींच्यान साश्ट म्हालांत खूबश्या वाठारांनी दिसपी मिठागरां इल्ली इल्ली ना जाल्यात. मीठ उत्पादनांतली वाडिल्ली वेवसायिकता, उदकाच्या प्रदुशणाचो मुद्दो, कामगारांचो उणाव आनी वाडपी लुकसाण ह्या आनी अशा साबार कारणांक लागून मिठागरां काबार जावपाचे वाटेर आसात. अजून लेगीत गोंय सकारा वतीन गरजेचो आदार मेळ्ळो जाल्यार मीठ उत्पादना खातीर फुडें सरपाची तयारी कांय शेतकारांनी दाखयल्या.
साश्ट म्हालांत चिंचणी, असोळणे, नावेली, केळशी, मडगांवां लागसारच्या खाडी वाठारांत कांय कडेन कांय वर्सां आदीं मिठागरां दिसतालीं. शेतीच्या कामांतल्यान फुरसत काडून शेतकार मीठ उत्पादन घेताले. साश्टींत ऑक्टोबरांतल्यान बांदांची देखभाल दुरुस्तीचीं काम सुरू जाताली. शेतांत गरजे परस चड उदक येवचें न्हय हे खातीर बांदाची दुरुस्ती करप गरजेचें आसतालें. त्या काळार चडशे लोक मीठ उत्पादन घेताले, हाका लागून एकाच शेतकाराचेर चड ताण येनाशिल्लो. ऑक्टोबरांतल्यान सुरू जाल्ली कामां मे म्हयन्या मेरेन मिठ निर्मिती मेरेन चलतालीं. पावसाळ्यांत हें काम नाशिल्ल्यान शेती कसप, नुस्तेमारी वेवसाय कडेन लक्ष दिताले. सादारण 25 वर्सां आदीं आयोडीनयुक्त मीठ खावपाचे फायदे सांगपाक लागले आनी शेतांतल्यान उत्पादन घेतिल्ल्या मिठा कडेन लोक आडनदर करपाक लागले. आयोडिनचें प्रमाण फावोश्या प्रमाणांत मेळोवचे खातीर विवीध कंपनी मीठ तयार करून बाजारांत हाडलें. हाका लागून खाडीच्या उदकांतल्यान निर्माण केल्ले मिठाचे उत्पादन उणें जावपाक सुरवात जाली. शेतकारांनी तयार केल्ल्या मिठाचो वापर खावचे खातीर न्हय जाल्यार माडांक सारें म्हूण घालपाकूय करताले. उत्पादनांतल्यान फायदो उणो जावपाक लागिल्ल्यान आनी तरणाटेय नोकरी करपाक प्राधान्य दिवपाक लागिल्ल्यान मिठागरांनी काम करचे खातीर मनीसबळ उणें जावपाक लागलें. कांय मिठागरांच्यो जमनी भाडेपट्टीचेर कसताले. जमीन वचपाच्या भंयान जमीन धनयांनी खूब जाणांक शेती सयत मीठ उत्पादन करपा पासून आडायले. तशेंच उदकाच्या प्रदुशणाचो मुद्दो लेगीत मिठागरां वसाड पडपाक कारणीभूत थारलो.
कांय वर्सां आदीं चिचणी गांवांत व्हड प्रमाणार मीठ निर्मिती जाताली. आयोडीन युक्त मीठ बाजारांत आयले उपरांत गोंयांतलीं मिठागरां बंद पडपाक लागलीं. गोंय सरकारान बांदाची दुरुस्ती, जमनीचे मशागती खातीर आदार केलो जाल्यार गांवांतले शेतकार मीठ उत्पादनांत आत्मनिर्भर जातले. हाका लागून शेतकारांचें उत्पन्न वाडटलें आनी खूबश्या पर्यटकांक मीठ उत्पदनाचें प्रात्यक्षीक दाखोवन पर्यटन वाड लेगीत शक्य आसा.
————————————————————————————-
गांवांतल्या मिठागरांतल्यान मीठ उत्पादन करचे खातीर आमचीं घरचीं लेगीत वावुरतात. खूबशे जाण मीठ उत्पादन कशें करतात, तें पळोवपाक येताले. 25 वर्सां सावन मिठागरां बंद आशिल्ल्यान सध्या हे जमनीची पुराय वाट लागल्या. आतां करपाचें म्हणल्यार नवी सुरवात करची पडटली आनी खर्च लेगीत चड येतलो. सरकारा कडल्यान उत्पादकांक अर्थीक मजत मेळ्ळी जाल्यार परतून मिठागरांतल्यान मीठ निर्मिती शक्य आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
