भांगरभूंय | प्रतिनिधी
प्रवीण आर्लेकारः मोपा उगव्यां रस्त्याचें काम सुरू
भांगरभूंय । प्रतिनिधी
पेडणें: आदल्या लोकप्रतिनिधींनी पेडणें मतदारसंघाचे उरगती कडेन लक्ष दिवचे बदला सुवार्था कडेन चड लक्ष केंद्रीत केलें. ताका लागून खूबश्यो अडचणी, समस्या निर्माण जाल्यात. आदल्या आमदारान फक्त भाशणबाजी करून लोकांक फटयले. जे प्रकल्प आयले, त्या प्रकल्पांनी थळाव्या लोकांक न्याय मेळचो हे खातीर सरकारा कडेन वा कंपनी कडेन कसलीच कबलात करूंक ना. रस्ते लेगीत वेवस्थीत करूंक नात. पूण हे मुखार मतदारसंघांतल्या रस्त्या सयत साबार समस्या सुटाव्यो करतले. मुख्यमंत्री डॉ. प्रमोद सावंत हांच्या आदारान उदरगतीचीं कामां नेटान चल्ल्यांत, अशें आमदार प्रवीण आर्लेकार हांणी सांगलें.
मोपा उगवें पंचायत वाठारांतल्या रस्त्याच्या कामाच्या वावराची सुरवात करून दिवपाच्या सुवाळ्यांत आमदार आर्लेकार उलयताले. ह्या वेळार तांचे वांगडा मोपाचे सरपंच सुबोध महाले, पंच अश्विनी महाले, काशिनाथ पेडणेंकार, सीया धुरी, समिक्षा महाले, दर्शन महाले हे पंच तशेंच थळावे दत्ताराम परब, सत्यवान नायक, संतोष, मुकुंद, प्रकाश, वसंत, निलेश, लक्ष्मण आनी हेर लोक हाजीर आशिल्ले. पेडणें मतदारसंघांतलीं रस्त्याचीं कामां वेंचणुके आदीं करतले. रस्त्यांचेर हॉटमिक्स डांबरीकरण लेगीत करतले. उदरगतीक चालना दितना जे प्रकल्प आयल्यात, तातूंत थळाव्या लोकांक रोजगार उपलब्ध करून दिवचे खातीर आपूण यत्न करता, अशें आमदार आर्लेकार हांणी सांगले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
