भांगरभूंय | प्रतिनिधी
खबरां संस्था
क्राइस्टचर्चः दोन टॅस्ट माळेंतली दुसरी टॅस्ट जिखपाक ऑस्ट्रेलियेक 202 धांवड्यांची गरज आसा. हेग्ले ओव्हल मैदानार तिसऱ्या दिसाचो खेळ सोपलो तेन्ना ऑस्ट्रेलियेन आपल्या दुसऱ्या डावांत 4 आवट 77 धांवड्यो केल्यात.न्युझिलंडान आपल्या दुसऱ्या डावांत 372 धांवड्यो करून ऑस्ट्रेलियेक जैता खातीर 279 धांवड्यांचे लक्ष्य दिला. तांणी पयल्या डावांत 162 आनी ऑस्ट्रेलियेन 256 धांवड्यो केल्ल्यो.
न्युझिलंडान आयतारा 2 आवट 134 धांवड्या वयल्यान टॉम लॅथमान (65) आनी रचीन रवींद्रान (11) हांणी खेळ फुडें सुरू केलो मात लॅथम 73 धांवड्याचेर आवट जालो. रवींद्रान अर्द शेकडो केलो. डेरिल मिचेला वांगडा ताणे चवथे विकेटी खातीर 123 धांवड्यांची भागिदारी केली. मिचेलान 58, रचिनान 82 धांवड्यो केल्यो. 296 धांवड्यो जाय मेरेन तांचे 6 विकेटी पडल्यो. ग्लेन फिलिप्स (16) आनी स्कॉट कुगलेइन हांणी सातवे विकेटी खातीर 53 धांवड्यांची भागिदारी केली. मेट हेनरीन 16 धांवड्यो करून स्कोर 300 वयर व्हेलो. टीम सावदी शून्यार आवट जालो. कुगलेइन 44 धांवड्यो करून आवट जालो आनी न्युझिलंडाचो दुसरो डाव 372 चेर सोपलो.
न्युझिलंड पयल्या डावांत 96 धांवड्यांनी फाटीं पडल्लो. ताका लागून जैता खातीर ऑस्ट्रेलियेक 279 धांवड्यांचें लक्ष्य मेळ्ळें. ताणी 4 विकेटी वोगडावन 77 धांवड्यो केल्ल्यान हे लक्ष्य आतां 202 धांवड्याचेर पावलां. ट्रवीस हेड (17) आनी मिशेल मार्श (27) खेळटात. स्टिवन स्मिथ (9), उस्मान ख्वाजा (11), लाबुशेन (6) आनी कॅमरून ग्रीन (5) आवट जाल्यात. मॅट हेनरी आनी बेन सियर्स हांणी तांकां आवट केलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
