भांगरभूंय | प्रतिनिधी
खबरां संस्था
धरमशालाः धरमशाला हांगचे पांचवे टॅस्ट मॅचींत भारता कडल्यान एक डाव आनी 64 धांवड्यानी इंग्लंडाक लजेक घालपी हार खावची पडिल्ल्यान इंग्लंडाचो आदलो कॅप्टन नासेर हुसेनानी सामकी निर्शेणी जाल्या. इंल्गंडाच्या बॅसबॉल क्रिकेट शैलीचेर ताणे तिडक काडल्या. इंग्लंडाच्या बॅट्समनांक वैयक्तीक कामगिरीचेर काम करपाचो तशेंच बॅसबॉलाचें पिशें सोडून दिवपाचो सल्लो ताणे दिला. टॅस्ट मॅचींत आक्रमक खेळ करपा खातीर इंग्लंडान बॅसबॉल शैली आपणायल्ली मात भारता आड ती तांच्याच आंगार आयिल्ल्याचें दिसून आयलें.
बॅसबॉल ह्या शब्दाक लागून आमचो गोंदोळ जाल्लो. इंग्लंड पंगड आनी वेवस्थापनाक बॅसबॉल व्हो शब्द फायद्याचो थारलो ना. ताका लागून तांणी आतां वैयक्तीक कामगिरीचेर लक्ष केंद्रीत करपाक जाय अशें ताणे स्काय स्पोर्टस मदल्या आपल्या कॉलमांत बरयलां. प्रतिस्पर्धी पंगडा कडेन पळयात. तांणी यत्न केले आनी तातूंतल्यान ते शिकले. मागीर आमी कमी कित्याक पडले, झॅक क्रॉवलीक बरी सुरवात मेळोवन व्हडली धांवसंख्या उबारपाक मेळ्ळी ना. बेन डकेटान आक्रमक पद्दत आपणायली. पुराय माळेंत बेन स्टोक्साची बॅट चल्ली ना. कारण तो फकत बॅट्समन म्हणून खेळ्ळो. आपल्या खेळाचेर लक्ष दिवंन तांणी सुदारणा करपाक जाय अशे हुसेनान इंग्लंड पंगडाक सांगलां.
बॅसबॉल विशीं बरेंच किदें उलयलां आनी बरयलां. हे परिस्थितींत वैयक्तीक कामगिरी म्हत्वाची आसता. जिमी अँडरसन आनी आर आश्वीन हे दोन खेळगडे म्हान जाले कारण तांणी आपल्या खेळांत सुदारणा करपाचेर लक्ष केंद्रीत केलें अशेंय हुसेनान म्हणलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
