भांगरभूंय | प्रतिनिधी
पेडणें, प्रतिनिधी: पत्रादेवी, न्हंयबाग, पोरस्कडें आनी किरणपाणी- आरोंदा या तिन्ही चेक नाक्यां वयल्यान सिंधुदुर्गांतल्या व्हड प्रमाणांत रेंव गोंयांत येता. दिसाक उणेच १०० ट्रक येतात. तांचे कडेन रेंव येरादारी करपाचो परवानोय नासता. हीं वाहनां कर्नाटक, केरळ, गोंय, महाराष्ट्र रजिस्ट्रेशनाचीं आसात. महाराष्ट्रांतल्यान रेंव घेवन हे ट्रक आयले जाल्यार गोंयचो, खास करून पेडणेंचो रेंव वेवसाय कसो सुरू जातलो, असो प्रस्न थळाव्या रेंव वेवसायिकांनी केला.
दोन दिसां पयलीं 10, 11 असो तक्टो लायिल्ले ट्रक नेटान गोंयांत येतना दिसलें. चवकशी केले उपरांत कळ्ळें की, जांचे कडेन 10 नंबराचो तक्टो आसा, तांचे कडल्यान ट्रीपी फाटल्यान 1000 रुपया हप्तो घेतात, अशें कळटा. तो दितकच तो ट्रक म्हापशें मेरेन वचपाक शकता. 11 नंबराचे ट्रक म्हापशेंच्या मुखार वचपाक शकतात. तांचे कडल्यान 1100 रुपया हप्तो घेतात, अशें कळटा. ह्या तीन नाक्या वयल्यान सांजवेळा सात ते सकाळीं स मेरेन शेंकड्यांनी ट्रक येतात. ट्रकांची तपासणी जायना. कांय ट्रक हुतात्मो स्मारका कडेन राविल्ले. तांकां विचारलें तेन्ना पास येवपाचे आसात, ते मेळना जाल्यार आमी परत वतले, अशें तांणी सांगलें. गोंयचें कांय दलाल महाराष्ट्रांतल्यान आयिल्ली ही रेंव सवाय भितर घेतात आनी दुपेट दर लावन विकतात, अशेंय कळ्ळां.
येरादारी अधिकाऱ्यांनी आमकां 10, 11 नंबरा विशीं कांय खबर ना, अशें सांगलें.
थळावे रेंव वेवसायीक त्रासांत
पेडणें तालुक्यांत उणेच पांच हजार लोक रेंव वेवसायाचेर निंबून आसात. थोड्यां कडेन ट्रक, व्हडीं आसात. तेरेखोल, शापोरा न्हंयेंत ते रेंव वेवसाय करताले. पूण तांकां तो करपाक अजून परवाने दिवंक नात. मात महाराष्ट्रांतल्यान रेंवेचे ट्रक मात येतात. हाचे फाटल्यान कोण राजकी फुडारी आसा काय ना, ताची तपासणी करची अशी मागणी रेंव वेवसायिकांनी केल्या. आमकां बेगीन परवाने दिवचे, अशेंय तांणी मागलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
