भांगरभूंय | प्रतिनिधी
मडगांव, प्रतिनिधी : लोकसभा वेंचणूक लढची अशी मागणी लोक करतात. उमेदवारी दिवपाचो निर्णय कॉंग्रेस पक्ष घेतलो. ही वेंचणूक आपली निमाणी वेंचणूक आसतली. तिकेट मेळ्ळ्यार लोकांनी फाटबळ दिवचें, जिखून आयल्यार उरिल्लीं कामां पुराय करतलों, अशें दक्षीण गोंयचे खासदार ङ्ग्रान्सीस सार्दिन हांणी सांगलें.
कुडतरचे कार्यावळींत दक्षीण गोंय खासदार फ्रान्सीस सार्दीन हांचे हाजेरींत दोन दिव्यांगांक तीन चाकी गाडयो भेटयल्यो. ह्या वेळार सार्दिन हांणी, खासदार म्हणून काम करतना लोकांच्या बर्या खातीरचीं उदरगतीचीं कामां केलीं. लोकांनी चार खेपो आपल्याक खासदार म्हणून वेंचून हाडलो. लोक आपणेंच वेंचणुकेक उबें रावचें अशीं मागणी करतात. ते प्रमाण ही निमाणी वेंचणूक लढपाचो विचार केला. कॉंग्रेस पक्षान तिकेट दिल्यार लोकांनीय फाटबळ दिवचें. वेंचणूक जिंखल्या उपरांत समाजांतलीं जीं कामां उरल्यांत तीं पुराय करतलों अशें तांणी सांगलें. गांवांत रस्ते आनी गरजेच्यो सुविधा मेळचे खातीर कार्यरत रावतलों. तिकेटीचो निर्णय कॉंग्रेस पक्ष घेतलो. फुडल्या सप्तका मेरेन उमेदवारीची घोशणां करतले, अशें तांणी सांगलें.
दक्षीण गोंय खासदार म्हणून काम करतना दिव्यांगांक दुसर्याच्या आधाराची गरज पडची न्हय ते स्वयंपूर्ण जावपा खातीर आतां मेरेन ४६ तीनचाकी गाडयो दिव्यांगांक दिल्यात. गांवगिर्या आनी शारी भागांतल्या शिक्षण वाठारांतल्या सुविधांनी बरोच फरक आसता. गांवगिर्या वाठारांतूय शारी भागा प्रमाण बर्यो सुविधा आनी उपकरणां उपलब्ध आसचीं. भुरग्यांक बर्यो सुविधायो मेळच्यो म्हणून सुमार ४५ विद्यालयांक कॉम्प्युटर भेटयल्यात. गुन्यांव आडावपा खातीर आनी नागरिकांचे सुरक्षितताये खातीर सीसीटीव्ही कॅमेरे खासदार निधींतल्यान बसयल्यात. आतां मेरेन जॉगर्स पार्क, पार्कांचें सोबितीकरण, तीन फुटबॉल मैदानां, चार ख्रिश्चन मसंडभुंयो केल्यात. सध्या खासदार निधींतल्यान विंगड विंगड कामां केल्यांत. आदल्या खासदारांचो दोन कोटी साठ लाखांचो निधी उरिल्लो, तोय आपल्याक मेळ्ळो आनी तो लोकांच्या फायद्या खातीरूच खर्च केला अशें सार्दीन हांणी म्हणलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
