भांगरभूंय | प्रतिनिधी
म्हापशेंः कळंगूटे सेंट आलेक्स चर्च मुखार सोबितकरण केल्ल्या डॉल्फीन सर्कल कारज्याचें उक्तावण केंद्रीय मंत्री श्रीपाद नायक हांचे हस्तुकीं जाले. ह्या वेळार आमदार मायकल लोबो, सरपंच जोजफ सिक्वेरा, उपसरपंच गीता परब, पंच वांगडी आनी नागरीक हजर आशिल्ले.
केंद्रीय मंत्री श्रीपाद नायक हांणी ह्या वेळार म्हणलें, कळंगूट पंचायत आनी आमदार लोबो हांणी ह्या सर्कलाक डॉल्फीनाचें स्वरूप दिवपाचे तोखणायेचें काम केलां. फाटल्या जायत्या वर्सां पसून ह्या सर्कलाचें काम अपुरे आशिल्ले. कळंगूट हे नामनेचे पर्यटन केंद्र आसा आनी आमदार आनी पंचायतीन राबयिल्ले विवीध उदरगतीचें प्रकल्प हे तोखणायेचें काम आसा.
ह्या मतदारसंघांतल्या उदरगतीच्या कामां खातीर केंद्र सरकारा कडल्यान आमकां निधी मेळिल्ल्यान हे शक्य जाला. जातूंत कोस्टल सर्कीट रोड रुंदीकरणाचें काम आनी संग्रहालय आशिल्ल्या आग्वाद किल्ल्याच्या दुरुस्ती खातीर निधीचोय आस्पाव आसा. आपल्या कार्यकाळांत केंद्र सरकारा कडल्यान राज्यांत राबयिल्ल्या प्रकल्पांची म्हायती ह्या वेळार श्रीपाद नायक हांणी दिली.
येवपी लोकसभा वेंचणुकेंत श्रापाद नायक हे भोवमान जिखून येतले. तांणी मंजूर केल्ल्या निधीक लागून कांदोळे दर्यादेगे नितळसाण घरां, पार्किगेंची सुविधा आनी आग्वाद किल्ल्याच्या दुरुस्तीचें काम करप शक्य जाले, अशें मायकल लोबो हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
