भांगरभूंय | प्रतिनिधी
-आरजीचे अध्यक्ष मनोज परब हांची टिका
पणजी: गोंयांत सध्या ‘स्पीड गव्हर्नर’च्या नांवान टॅक्सी चालकांची सतावणूक सुरू आसा. सरकारान पयलींच गोवा मायल्स सारक्या खाजगी टॅक्सी अॅप सेवा केल्ल्यान परंपरीक टॅक्सी चालकांचो वेवसाय सोंपलां. आतां टॅक्सींक स्पीड गव्हर्नर बसोवपाची सक्ती करून सरकार तांकां परतून संकश्टांत हाडपा, अशी टिका रिव्हॉल्यूशनरी गोवन्साचे (आरजी) अध्यक्ष तशेंच उत्तर गोंयचे उमेदवार मनोज परब हांणी केल्या.
पणजे घेतिल्ले पत्रकार परिशदेंत ते उलयताले. राज्य सरकारान वेवसायीक टॅक्सींक स्पीड गव्हर्नर बसोवप सक्तीचे केल्ल्यान येरादारी पुलिसां कडल्यान टॅक्सी आडावन तांची तपासणी करतात. जांच्या टॅक्सींत स्पीड गव्हर्नर ना, तांकां तालांव दितात. हाचे पयलीं सरकारान स्पीड गव्हर्नर बसोवपा खातीर कांय खाजगी टॅक्सी कंपनी नेमिल्ल्यो. त्या वेळार जायत्या टॅक्सी वेवसायिकांनी स्पीड गव्हर्नर बसोवन घेवपाचे थारायिल्ले. पूण कंपनी कडेन ते उपलब्ध नाशिल्ल्यान कंपनीनी पयशे घेवन फक्त फिटनेस प्रमाणपत्र वाहन धनयांक दिले. येरादारी पुलिसांनीय तपासणी करिनासतना परवानो दिलो, असो दावो परब हांणी केला.
येरादारी पुलीस सध्या स्पीड गव्हर्नर नाशिल्ल्या टॅक्सी धनयांक 10 हजारां मेरेन तालांव दितात. ताका लागून टॅक्सी धनी संकश्टांत सापडत आसात. हाचो सरकारान गांभीर्यान विचार करप गरजेचें, अशें परब हांणी म्हणलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
