उदकाची पायप लायन फुटिल्ल्यान म्हापशें बाजारांत उदक
भांगरभूंय | प्रतिनिधी
म्हापशें, प्रतिनिधी ः म्हापशेंच्या बाजारांतल्या तीन सुवातींनी उदकाची पायप लायन फुटिल्ल्यान म्हापशें बाजार उदकान भरलो. हाका लागून दुकानदारांक त्रास जालो.
ही घडणूक सकाळीं घडली. बाजारांतल्या सदानंद कोल्ड्रिंक दुकानां मुखार मुखेल उदका पायप लायन जाल्यार शांतादुर्गा हॉटेल आनी पेराडाईस फार्मसीच्या वाठारांतली जोड पायपलायन फुटली. बाजारांतलीं गटारां कोयरान भरल्यात देखून उदक गटरांनी भरुन रस्त्यांचेर तुंबलें.
हो प्रकार कळटाच म्हापशें ट्रेडर्स असोसिएशनाचे अध्यक्ष श्रीपाद सावंत सुवातेर आयलें. ताणें बांदकाम खात्याच्या उदका पुरवण विभागाक उदका पायप लायन फुटिल्ल्याची म्हायती दिली. उदका पुरवण कामगारांनी बेगोबेग फुटिल्ली उदका पायप लायन बंद केली. आनी उपरांत सांजवेळार ती दुरुस्त केली. पूण फुटिल्ले पायप लायनीक लागून देड वरां भितर बाजारांत हुंवारा सारकी परिस्थिती निर्माण जाली. कोयरान भरिल्ली गटारां हाचें फाटलें कारण. सध्या जर पावस पडलो जाल्यार आयच्या परस बाजारांत व्हड समस्या निर्माण जातली. देखून पालिकेन बाजारांतली गटारां बेगीन निवळ करची अशें म्हापशें वेपारी संघटणेचे अध्यक्ष श्रीपाद सावंत हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
