भांगरभूंय | प्रतिनिधी
हैदराबाद, खबरां संस्था ः आंध्र प्रदेशांतल्या संगमेश्वरा लागसारच्या दर्यांत नुस्तेमारी खातीर लायिल्ल्या जाळ्यांनी आडकून 138 ऑलिव्ह रिडले कांसवांक मरण आयलें. नुस्तेंमारी जाळी बेकायदेशीर रितीन घाल्ली असो आरोप ‘ट्री फावंडेशन’ हे संस्थेन केला. सध्या राज्याच्या उदेंत आनी अस्तंत दर्यादेगांचेर दर्यांतल्या कांसवांचो हंगाम सुरु आसा. ऑलिव्ह रिडले जातीचे कांसव तांतयां घालपाक दर्यादेगेर येतात.
मजगतीं, संघमेश्वर दर्यादेगेर स्टिंग रे जातीचें नुस्तें धरपाक जाळीं घाल्ली. ओडिशा आनी आंध्र प्रदेश राज्यांनी कांसवाच्या हंगामा वेळार दर्यादेगेर नुस्तेंमारी करप बेकायदेशीर आसा. तरीय नुस्तेमार आपल्या जाय तेंच करतात.
तांतयां घालपाचो यत्न करपी जायत्या मादी कांसव स्टिंग रे नुस्तें धरपाक दर्यादेगेर घाल्ल्या जाळ्यांत आडकलीं. तातूंतले सुमार 138 ऑलिव्ह रिडले कांसव मेल्ल्याचें दिसून आयलें. ह्या कांसवांच्या पोटांत शंबरां परस चड तांतयां मेळ्ळीं. ट्री फावंडेशनान सोशल मिडियाचेर पोस्ट करून हे संबंदी म्हायती दिली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
