भांगरभूंय | प्रतिनिधी
चवकशे उपरांत फोंडें पुलिसांचो अदमास, तिगांक अटक
फोंडें, प्रतिनिधी ः बेतोड्यां जंक्शनाचेर स्कुटरीन वचपी सचिन कुट्टीकार (३३, गटमड- उसगांव) हाचे फाटीर फारपेट केल्ल्या प्रकरणांत फोंडें पुलिसांनी आयज देविदास मसुरकार (47, शांतीनगर- फोंडें) हाच्या सयत मुळ बिहाराचे प्रवीण प्राजु पासवान (२२) आनी प्रभात प्राजु पासवान सध्या बेतोड्यां रावपी ह्या तिगांक अटक केली. दुबावीताचे बायले कडेन सचिनाचे अनैतिक संबंद आशिल्ल्याचो दुबाव आशिल्ल्यान ताणें ताका मारपाचो कट रचलो, अशें प्राथमीक चवकशेंतल्यान पुलिसांक कळ्ळां.
काल शुक्रारा सकाळीं सुमार 6 वरांचेर बेतोड्यां जंक्शनाचेर जाल्ले फारपेट प्रकरण एक धक्को दिवपी घडणूक आसा. जखमी सचिन बोरी वाठारांत ट्रक चालक म्हणून काम करता. जाल्यार देविदासाचो फॅब्रिकेशनाचे वर्कशॉप आसा. दुबावीत प्रवीण आनी प्रभात हे ताचे कडेन काम करतात.
पुलीस सुत्रांनी दिल्ले म्हायती प्रमाण, डिसेंबरांत देविदासाक सचिनाचो आपले बायले कडेन अनैतिक संबंद आसा असो दुबाव आयल्लो. देविदास घरांत नासतना सचीन ताच्या घरा येतालो अशेंय ताका कळ्ळें. हाकाच लागून तांचे मदीं वाद जाल्लो. हाका लागून देविदासान आपले कामगार प्रवीण आनी प्रभात हांका सचिनाक मारपाचें सांगलें.
दुबावीत देविदास हाच्या प्लॅना प्रमाण काल शुक्रारा बेतोडेंच्या जंक्शना लागसार आशिल्ल्या स्पीडब्रेकराचेर स्कुटरीची गती उणी केले उपरांत ताचेर फाटीर गुळी मारली. हे घडणुकेंत सचिन गंभीर जखमी जाल्ल्यान ताका उपचारा खातीर गोमेकॉत दाखल केलो. ताचेर उपचार सुरू आसात. आतां ताची स्थिती सुदारता अशी म्हायती पुलीस सुत्रांनी दिल्या.
मजगतीं फोंडें पुलिसांनी काल सांजवेळार प्रवीण पासवान आनी प्रभात पासवान हांचे वांगडा देविदास मसुरकाराक ताब्यांत घेतिल्ले. आयज सकाळीं चवकशी करून तांकां तिगांकय अटक केल्या. पुलीस फुडलो तपास करता.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
