भांगरभूंय | प्रतिनिधी
सांखळे, प्रतिनिधी : हरवळेंच्या ‘श्रीक्षेत्र रुद्रेश्वर देवस्थाना’त मानपाना वयल्यान महाजनां मदीं सुरु जाल्ल्या वादाचो परिणाम महाशिवरात्रीचेर जाल्लो. हाका लागून बऱ्याच वर्सां सावन चलत आयिल्ल्यो परंपराय आयज जावंक नात. महाजनांच्या वादाक लागून काल सकाळ सावन सुरू जाल्ल्या तणावाक लागून प्रशासनान मध्यान रातीं देवूळ बंद केलें. ताका लागून आयज सकाळीं जावपी पारंपरीक दिवजोत्सव आनी रथोत्सव रद्द करचो पडलो.
हरवळेंच्या देवळांत महाशिवरात्रे निमतान आयोजीत ‘अभिषेक आनी आरतीच्या मानपाना’ वयल्यान देवस्थान समिती आनी वयल्या हरवळेंच्या गांवकारां मदीं वाद जालो. वाद घालपी सगळ्यांक दनपारां पुलिसांनी देवळा भायर काडले आनी देवूळ आपल्या ताब्यांत घेतले. रात मेरेन हो वाद सुटावो जालो ना. देखून प्रशासनाच्या आदेशा वयल्यान देवूळ बंद केलें.
मजगतीं, आयज (9 मार्च) कुडणेच्या श्री कुडणेश्वर देवस्थानाचे महाजन मळीक गांवकार दिवजोत्सव सुवाळ्याचो पयलो मान स्वीकारपाक आयले. पूण प्रशासनान देवळांतल्यो सगल्यो विधी रद्द केल्यात अशें कळटकच तो अस्वस्थ जालो. कसलीच सुचोवणी दिवचें बगर वा आदीं कळोवचें पयलीं ह्यो विधी कश्यो रद्द केल्यो असो मळीक गांवकारांनी प्रशासनाक प्रस्न विचारुन ताचेर आक्षेप घेतलो.
वयलो प्रकार चालू आसतनाच हरवळेंचें गांवकार परंपरे प्रमाण श्री सांतेरी केळबायचो कलश घेवन थंय पाविल्ले. पुलिसांनी तांकांय भितर वचपाक आडायल्ल्यान बोवाळ सुरु जालो. देखून गांवकारांनी देवळांतली पालखी देवळांतल्यान भायर येवपाक दिवंक ना. ह्या कारणाक लागून देवळाचीं दिवजां आनी रथ ह्यो दोनूय परंपरा आयज सकाळीं जावंक नात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
