भांगरभूंय | प्रतिनिधी
खबरां संस्था ः कोरोना म्हणलें की आमकां सगळ्यांक याद जाता तीं दोन वर्सा. तातूंत लॉकडावन, व्हायरस, संसर्ग, मास्क, सुरक्षीत अंतर अशीं सगळीं उतरां आमी आयकली आनी तो वेळ आमी अणभवलो. कोरोना व्हायरस भारतांतच न्हय तर संवसारभर पातळ्ळो. पूण हें आडावपाचो उपाय म्हणून आमच्या देशांन कोविशील्ड आनी कोवाक्सिन अश्यो दोन लसी सोदून काडल्यो. ह्यो दोन लसी देशभरांत लोकांक दिल्ल्योच तशेंच संवसारांतल्या जायत्या देशांक ह्यो लस पुरवण केल्यो.
कोरोनाच्या काळांत केंद्र सरकारान पुराय देशांत लसीकरणाची मोहीम चालीक लायिल्ली. ‘कोविशील्ड’ आनी ‘कोवॅक्सिन’ ह्यो दोन लस भारतीयांक दिल्ल्यो. पूण हांतूतली खंयची लस चड प्रभावी आशिल्ली? हो प्रस्न सगळ्यांकच आशिल्लो. ताची जाप एका संशोधन अहवालांत मेळ्ळ्या.
लॅसंट रिजनल हेल्थ साउथ ईस्ट आशिया ह्या नेमाळ्यांत उजवाडाक आयिल्ल्या संशोधन अहवालांत ह्या प्रस्नाची जाप मेळ्ळ्यां. हें संशोधन ११ ग्रुप ऑफ इन्स्टिट्यूट्साचेर केलां. ह्या संशोधन अभ्यासांत नॅशनल सेंटर फॉर बायोलॉजिकल रिसर्चच्या संशोधकांचोय वांटो आसा.
ह्या संशोधना प्रमाण कोविशील्ड ही लस कोवॅक्सीना परस चड प्रभावी आसा. ह्या म्हत्वाच्या संशोधनांत दोनूय लसांची तुळां केल्या. हें संशोधन जून २०२१ ते जानेवारी २०२२ मेरेन केलें. हातूंत 691 व्यक्तींचो आस्पाव आशिल्लो. संशोधनांत वांटो घेवपी लोक पुणे आनी बेंगळुरूचे तशेंच 18 ते 45 वर्सां पिरायेच्या गटांतले आशिल्ले. लस घेवचे पयलीं आनी उपरांत लोकांची रोगप्रतिकार शक्त कशी वाडली वा उणी जाली हाचो अभ्यास करून हो निश्कर्श काडलो.
कोरोना आडावपा खातीर कोविशील्ड लस घेतिल्ल्यांची रोगप्रतिकार शक्त कोवाक्सीन घेतिल्ल्या लोकां परस वाडिल्ल्याचे दिसून आयलें. तशेंच कोविशिल्ड घेतिल्ल्या लोकां मदीं अँटीबॉडीजची लेव्हल खूब वाडल्याचे दिसून आयलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
