भांगरभूंय | प्रतिनिधी
म्हापशें: कळंगूट पुलिसांनी डॉल्फीन सर्कला कुशीक धाड घालून 1 कील 200 ग्राम गांजो जप्त केलो. जप्त केल्ल्या गांज्याचें मोल 1 लाख 20 हजार रुपया आसा. ह्या प्रकरणांत पुलिसांनी हबिबल चलिमुद्दीन मोंडल (64, रा. दिनाजपूर, अस्तंत बंगाल) ह्या दुबाविताक अटक केल्या.
पुलिसांनी ही कारवाय शुक्रारा रातीं 1 ते फांतोडेर 3 वरांच्या सुमाराक केली. नायकावाडो, कळंगूटे डॉल्फीन सर्कला कुशीक ड्रग्साचो विक्री वेव्हार जावपाचो आसा अशी म्हायती पुलिसांक मेळिल्ली. ते प्रमाण घडणूक थळार पुलीस पंगडान सांपळो रचलो.
दुबावीत आरोपी घडणूक थळार आयलो तेन्ना ताका पुलिसांनी धरलो आनी ताची झडटी घेतली तेन्ना ताचे कडेन 1 कील 200 ग्राम गांजो सांपडलो. पुलिसांनी हो गांजो जप्त केला आनी दुबाविताक पुलीस स्टेशनार हाडून घुंवळे वखदां प्रतिबंध कायद्या खाला गुन्यांव नोंद करून ताका अटक केल्या.
पुलीस निरिक्षक परेश नायक हांच्या मार्गदर्शना खाला उपनिरिक्षक अक्षय पार्सेकार, किरण नायक, हवालदार विद्यानंद आमोणकार, कॉन्सटेबल मनोज नायक, विजय नायक, गौरेश कारबोटकार, प्रणय गांवस, गणपत तिळोजीव योगेश बोर्डेकार ह्या पंगडान ही कामगिरी केली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
