भांगरभूंय | प्रतिनिधी
म्हापशें: सातारशेत, हळदोण्यां भुंयगत वीज वाहिन्यो घालपा खातीर दवरिल्ले वीज केबल्स उजो लावन लासून उडोवपाचो प्रकार घडलो. हो उजो म्हापशें उजो पालोवपी दळाच्या जवानांनी पालयलो. पूण तो मेरेन सगले केबल्स जळून गोबर जाल्ले.
ही घडणूक काल (शुक्रारा) दनपारां 12 वरांच्या सुमाराक घडली. सद्या हळदोणें मतदारसंघांत उच्च दाबीत भुंयगत वीज वाहिन्यांचें काम वीज खात्यान हातांत घेतलां. मतदारसंघांतल्या चडशा वाठारांनी हें काम पुराय जालां.
सद्या सातारशेत आनी सरभोंवतणच्या वाठारांत भुंयगत वाहिन्यो घालपा खातीर कंत्राटदारान हे केबल्स घडणूक थळार हाडून दवरिल्ले. पूण ह्या केबलांक कोणे तरी उजो लायलो. वीज केबल आनी सुक्या तणाक उजो लागिल्ल्याची म्हायती थळावे रहिवाशी गोयल गरड हांणी म्हापशें उजो पालोवपी दळाक दिली.
उपरांत रोखडेंच उजो पालोवपी दळाच्या जवानांनी घडणूक थळार धांव घेवन उजो पालयलो. पूण तो मेरेन सगले केबल जळून गेल्ले. म्हापशें पुलिसांनी गरड हांचे कागाळी प्रमाण ह्या प्रकरणांत उजो अपघात म्हणून प्रकरण नोंद केलां.
पूण ह्या प्रकरणांत वीज खातें वा संबंदीत कंत्राटदारा कडल्यान रितसर कागाळ पुलिशेंत दिल्ली ना.
मजगतीं, हे घडणुकेचो हळदोणेंचे आमदार अॅड. कार्लुस फेरेरा हांणी निशेध केलो. मतदारसंघांतल्या भौशीक विकासकामांक कांय जाण आडमेळीं हाडपाचो यत्न करतात. हें प्रकरण हाचोच एक वांटो आशिल्ल्याचो आरोप तांणी केलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
