पोरण्या गोंयांत साधन सुविधा उदरगत कामांचें पंतप्रधानांचे हस्तुकीं आभासी पद्दतीन उक्तावण

भांगरभूंय | प्रतिनिधी

भांगरभूंय । प्रतिनिधी
पोरणे गोंयः  पोरण्या गोंयांतल्या बॉसिलिका ऑफ बों जिजस वाठारांत ‘प्रसाद’ ( रिज्युव्हॅनेशन अॅण्ड स्पिरिच्युल ऑगुमेन्टेसन ड्रायव्ह) मोहिमे खाला साधन सुविधा उदरगत कामाचें  पंतप्रधान नरेंद्र मोदी हांणी आभासी पद्दतीन बिरेस्तारा उक्तावण केलें. पोरण्या गोंयां सयत देशाच्या वेगवेगळ्या 43 सुवातांनी हे मोहिमे खाला 2400 कोटी खर्चाच्या प्रसाद कामां सुरवात केल्यांत आनी कांय कामाचें उक्तावण केला. जम्मू आनी काश्मिरात श्रीनगर हांगा पंतप्रधानांचे उपस्थितींत मुखेल कार्यावळ जाली. हे आभासी कार्यावळीक केंद्रीय पर्यटन राज्यमंत्री  श्रीपाद नायक, पर्यटन मंत्री रोहन खंवटे, पर्यटन उदरगत म्हामंडळाचे अध्यक्ष आमदार गणेश गांवकार, कुमारजुवेंचो आमदार राजेश फळदेसाय, राज्यसभा खासदार सदानंद शेट तानावडे आनी बॅसिलिकाचे रेक्टर फादर पॅट्रिसियो फर्नांडीस हाजीर आशिल्ले.
सुमार 17 कोटी रुपये खर्चून पोरण्या गोंयांतल्या दायज वाठारांत पार्किंग, हॅरिटेज इंटरप्रिटेशन सेंटर बांदतले. पार्किंग सुवातेंत 132 चारचाकी, 16 बशी आनी 205 दुचाकी दवोरपाची वेवस्था करतले. पर्यटकां खातीरच्या इंटरप्रिटेशन सेंटरांत होप ऑन होप ऑफ वाहन सेवा, काफेटेरिया, सपोर्ट ऑफीस रूम हाची सुविधा आसतली.
नोव्हेंबर मेरेन प्रसाद सुविधा तयार जातल्यो. 21 नोंव्हेंबर ते 5 जानेवारी 2025 मजगतीं सेंट फ्रान्सिस झेवियराच्या पवित्र अवशेशाचें प्रदर्शन जातलें.
आपल्या कडेन पर्यटन मंत्रालयाचो स्वतंत्र ताबो आशिल्लो तेन्ना 2014 वर्सा जाल्ल्या अवशेश प्रदर्शना वेळार आपणे पोरण्या गोंयांत साधन सुविधा कामां खातीर 102 कोटी रुपया मंजूर केल्ले. तातूंतली सुमार 7 कोटी रुपयांची कामां अजून चल्ल्यांत अशी म्हायती  श्रीपाद नायक हाणे  कार्यावळींत उलयतना दिली. गोंयांत जे पर्यटक येतात ते पोरण्या गोंयांत आयले बगर रावनात. ताका लागून थंय जाय त्यो सुविधा तयार करपाची गरज आसा. प्रसाद मोहिमे खााल हातांत धेतिल्लीं कामां आठ म्हयन्यांत पुराय करतले अशें सदानंद शेट तानावडेन सांगलें.
प्रसाद मोहीम सुरू केल्ली तेन्ना बॅसिलिकाचे रॅक्टर फा. पॅट्रिसियो फर्नांडीस हांच्या वांगडा बसून आमी साधन सुविधे संबंदीचो आराखडो तयार केल्लो. सुरवेक 41 कोटी आनी सध्या 17.75कोटी रुपये मंजूर केल्यात. अवशेश प्रदर्शना पयलीं सगल्यो सुविधा चालीक लावपाचो आमचो यत्न आसतोलो अशें रोहन खवंटे हाणी सांगलें. प्रसाद मोहिमे खाला साधन सुविधा उदरगती खातीर बॅसिलिका बों जिजसाची निवड केल्ले खातीर फा. पॅट्रिसियो फर्नांडीस हांणी खोस उक्तायली.