भांगरभूंय | प्रतिनिधी
पणजी : स्मार्ट सिटीचीं कामां पुराय जाल्या उपरांत पणजेच्या विवीध जमनी पोंदच्या सरयांचे भुगोलीक म्हायती यंत्रणेचें (जीआयएस) चित्र थळाव्यांक दितले. अशें केल्ल्यान फुडाराक जमनी पोंदच्यान सरयो घालपाचें काम सोपें जातलें, अशी म्हायती स्मार्ट सिटीचे मुखेल कार्यकारी अधिकारी संजित रॉड्रिग्ज हांणी दिली.
पणजेच्या एका गृहनिर्माण सोसायटींत पीएनजी गॅस पायपलायनच्या उक्तावणा वेळार रॉड्रिग्ज उलयताले. स्मार्ट सिटीचीं कामां करतना घाणयार्या उदकाचीं पायपां सोडून जमिनी पोंदच्यो हेर सरयो रस्त्याचे एके कुशीक हालयल्यात. हातूंत स तरेच्यो जमनी पोंदच्या सरयांचो आसपाव आसा. हे विशीं जीआयएस चित्र दितले. ताका लागून फुडाराक नव्यो सरयो घालचे पयलीं पीडब्ल्यूडी वा हेर विभागां कडेन वच्चें पडचें ना, अशेंय तांणी ह्या वेळार म्हणलें.
हें चित्र सगळ्यां खातीर उपलब्ध आशिल्ल्या गरजेची परवानगी घेवन जमनी पोंदच्यान सरयो घालतले. ताका लागून एक सरी घालतना ती दुसरेक लागची ना. ह्यो सरयो रस्त्याच्या कुशीक पार्कींग वा फुटपाथा सकयल दवरल्यात. ताका लागून विशेश चेंबर केल्यात. ताका लागून फुडाराक पणजेचे रस्ते खणपाचो प्रस्नूच येवचो ना, अशें रॉड्रिग्ज हांणी सांगलें.
आमी पणजेक एलपीजी गॅस मुक्त असो दर्जो मेळोवपा खातीर यत्न करतले. एलपीजी जाग्यार पीएनजी गॅस चड वापरचो, ताका लागून विशेश मोहीम राबयतले. विवीध गृहनिर्माण संस्था, हॉटेल आनी वेवसायीक आस्थापनांनी पीएनजी जोडणी घेवपाचो आमी यत्न करतात. सध्या पणजेच्या सुमारे दोन हजार लोकांनी पीएनजी गॅस जोडणी घेतल्या, अशें संजित रॉड्रिग्ज हांणी ह्या वेळार सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
