भांगरभूंय | प्रतिनिधी
-राजभवनाच्या उपक्रमाची हेर राज्यांनी केल्या तोखणाय
पणजीः राजभवनांत आयोजीत कार्यावळींत राज्यपाल पी. एस. श्रीधरन पिल्लई हांणी राज्यपाल निधींतल्यान 144 कॅन्सर दुयेंतीक अर्थीक मजत भेटयली. राजभवनाच्या पोरण्यां दरबार सभाघरांत आयोजीत केल्ले हे कार्यावळींत राज्यपालांचे सचीव एम. आर. एम. राव आनी अतिरिक्त सचीव संजीव सी. गांवस देसाय हाजीर आशिल्ले.
राज्यपाल पिल्लई हांणी जाहीर केल्ले प्रमाण डायलीसीस, कॅन्सर आनी हेर दुयेंतींक अर्थीक मजत दिवपाचें काम चालू आसा. गोंयांत राजभवनान सुरू केल्लो अशा प्रकारचो उपक्रम हेर राज्यांनीय सुरू करून गरजू लोकांक अर्थीक मजत दितात. राजभवनाच्या ह्या उपक्रमाची हेर राज्यांनी तोखणाय केल्या, अशें राज्यपालांनी सांगलें
कॅन्सर दुयेंसाचेर आतां सगळीं कडेन उपचार उपलब्ध आसात आनी वेळार उपचार घेतल्यार 80 टक्के दुयेंती बेगीन बरे जातात. अशा दुयेंतींक मानसीक आदार दिवपा वांगडा वैजकी उपचारांचेर विस्वास आसपाक जाय. राज्यपालान कॅन्सर दुयेंतीं बेगीन बरे जावचें अशें देवालागीं मागलें.
राज्यपालान अर्थीक मजतीचे धनादेश संबंदीत अतिरिक्त जिल्हाेधिकारी आनी मामलेदारां कडेन दिले.
सुरवातीक राज्यपालांचे सचीव एम. आर. एम. राव हांणी सगळ्यांक येवकार दिलो. श्रेया गुरव हांणी उपकार मानले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
