भांगरभूंय | प्रतिनिधी
भांगरभूंय । खबरां मेज
पणजीः नामनेचे लेखक, संशोधक, आनी विद्वान डॉ.मनोहरराय सरदेसाय हांच्या जल्म शती वर्सा निमतान गोंय विद्यापिठाच्या शणैय गोंयबाब स्कूल ऑफ लँग्वेज अँड लिटरेचरा वतीन 13 आनी 14 मार्चाक दोन दिसांचो राष्ट्रीय परिसंवाद आयोजीत केला. “डॉ मनोहरराय सरदेसाय हांची जीण आनी वावर ” ह्या विशया वयल्या परिसंवादाची ही कार्यावळ विद्यापिठाच्या प्रशासकीय इमारतींतल्या परिशद सभाघरांत जातली.
सर्गेस्त डॉ सरदेसाय हांणी गोंय विद्यापिठांत फ्रेंच भाशा विभागाचे मुखेली म्हणून काम केल्लें. पॅरीस- फ्रान्स हांगच्या सॉर्बोन विद्यापिठांत फ्रान्सांत भारताची प्रतिमा ह्या विशयाचेर प्रबंद सादर करून तांणी पीएचडी मेळयल्ली. कोंकणी, इंग्लिश, फ्रेंच, पोर्तुगीज आनी मराठी भाशेंत तांणी भरपूर लेखन केलां. तांचें योगदान तांच्या प साहित्यीक वावरा पुरतें मर्यादीत नाशिल्लें. जायत्या नव्या लेखकांक तांणी पोशवण दिल्ली. साहित्य अकादमी, फ्रेंच सरकारा आनी हेर संस्थां कडल्यान तांकां जायते पुरस्कार फावो जाल्ले.
परिसंवादात निबंद सादरीकरण, साहित्यीक चर्चा, भोवभाशीक कवी संमेलन जातलें.देशांतल्यो नामनेच्यो व्यक्ती, संशोधक आनी विद्यार्थी परिसंवदांत वांटो घेतले. परिसंवाद प्रा. अनुराधा वागळे, डॉ हनुमंत चोपडेकार, अंथनी गोम्स हांणी आयोजीत केला. गोंय विद्यापिठाच्या बेवसायटीचेर जाय ती म्हायती मेळपाक शकता.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
