भांगरभूंय | प्रतिनिधी
भांगरभूंय । प्रतिनिधी
मुरगांवः लोकसभा वेंचणुके खातीर दक्षीण गोंय लोकसभा मतदारसंघांत भाजपान बायलेक उमेदवारी दिल्यार आमचो ताका येवकार आसतलो आनी मुरगांव मतदारसंघांतल्यान तिका 80 टक्के मतां मेळोवन दिवपा खातीर वावुरतले अशें मुरगांवचो भाजपाचो आमदार संकल्प आमोणकार हाणी सांगले. सडा हांगा डॉ आंबेडकार सभाघरांत आयोजीत केल्ल्या मुरगांव मतदारसंघ नारी शक्ती वंदन कार्यावळींत ते उलयताले.
लोकसभा वेंचणुकेंत दक्षीण गोंयांत भाजपाक बायलांचो व्हडा प्रमाणांत तेंको मेळटलो. पक्ष जो उमेदवार थारायतोलो ताका व्हडल्या मताधिक्यान वेंचून हाडपाची आमची जापसालदारी आसतली. बायल सशक्तीकरणाचे नदरेन भाजपाच्या सांसदीय समितीन दक्षीण गोंयांत बायलेक उमेदवारी दिवपाची थारायल्यार तो एक बरो निर्णय आसतोलो अशें आमोणकारान सांगलें.
दक्षीण गोंयांत बायलेक उमेदवारी दिवपाचें भाजपान जर थारायलां जाल्यार बायलांचो पक्षान केल्लो तो भोवमान आसतोलो अशें मुरगांव पालिका मंडळाची नगरसेविका श्रद्धा आमोणकारान सांगलें. नारी शक्ती वंदन कार्यावळीक भाजपाचो मुरगांव गटाध्यक्ष संजय सातार्डेकार, मुरगांव भाजप प्रभारी संतोष केरकार, रवींद्र भवनाचो उपाध्यक्ष डॉ धर्मेंद्र प्रभुदेसाय, आदली नगराध्यक्ष अर्चना कोचरेकार, प्रसाद प्रभुगांवकार, संगीता गावडे, किशोरी नायक, अविनाश नायक हाजीर आशिल्ले.
कार्यावळी वेळार डॉ वंदना बांदोडकार आनी डॉ प्रिया सी हांणी भलायके संबंदीची बायलांक म्हायती दिली सुरवेक संकल्प आमोणकार हाच्या फुडारपणा खाला सडा वाठारांत नारी शक्ती वंदना फेरी काडली
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
