भांगरभूंय | प्रतिनिधी
वास्को, प्रतिनिधी: नौदळ सहकार्य करिनाशिल्ल्यान बिर्ला चौक ते दाबोळी चौक मजगतीं बांदपी नियोजीत उड्डाणपुलाच्या बांधकामा सामकार आडखळी निर्माण जाल्यात. तशेंच फनेल झोनांत घर बांदपा खातीर परवानगी दिवनूय तींच बांदकामां मोडपाक फुडाकार घेतिल्ल्यान नौदळा आड लोकांनी तिडक उक्तायल्या. हे विशीं हालींच गोंय भेटेक आयिल्ले संरक्षण मंत्री राजनाथ सिंग हांचे कडेन ह्यो समस्या आपणें मांडिल्ल्याचें पंचायत मंत्री मॉवीन गुदिन्हो हांणी सांगलें.
नौदळान स्वतःच्या वसणुकेंत उंच इमारती बांदल्यात. ताका लागून तांणी कोणा कडेन परवानगी मागिल्ली? हे विशीं नौदळान स्पश्ट करचें,असो उलो तांणी मारलो.
बिर्ला चौक ते दाबोळी चौक मजगतींच्या म्हामार्गाचेर येरादारी वाडल्या. तशेंचे रस्त्याचे दोनूय वटेन लोकवस्ती आशिल्ल्यान लोकांक रस्त्या पलतडीं वचपाक अपघातांक तोंड दिवचें पडटा असो भंय तांणी उक्तायला. ताका लागून बिर्ला चौक ते दाबोळी चौक मजगतींचो उड्डाण पूल बांदपाचो प्रस्ताव आपणें आनी मुख्यमंत्री डॉ. प्रमोद सावंत हांणी केंद्रीय मंत्री नितीन गडकरी हांचे मुखार दवरिल्लो. तांणी हो उड्डाण पुल बांदपाक साडे पांचशें कोटी रुपया मंजुर केल्या उपरांत निविदाय काडिल्ली. ताका लागून बांधकामाक सुरवात जातली. मात नौदळ सहकार्य दिनाशिल्ल्यान ह्या कामांत आडखळ निर्माण जाल्या. नौदळान कांय वर्सां आदीं भारतीय राष्ट्रीय महामार्ग प्राधिकरणाच्या सुमार दोन हजार चौरस मीटर जमिनीचेर अतिक्रमण करून ती आपले हद्दींत घेतिल्ली. हे विशीं हालींच जिल्होधिकारी, सरकारी अधिकारी , नौदळ अधिकारी हांचे वांगडा जाल्ले बसकेंत नौदळाची ही जागा परत राष्ट्रीय महामार्ग प्राधिकरणाक दिवपाचें थारायल्लें. मात आतां नौदळ सहकार्य करपाक तयार ना. प्राधिकरणान स्वखर्चान नौदळाचो आडो, गटार बांदून दिवपाची तशेंच केबल दुसरे कडेन स्थलांतरीत करपाची तयारी दाखयल्ली मात आतां नौदळान तुमी जमीन संपादन करात, आमी दितात अशी भुमिका घेतल्या. ही जमीन संपादन करपाक कांय वर्सां लागतलीं. तो मेरेन उड्डाण पुलाचें बांदकाम तशेंच आडोवन दवरचें काय? असो प्रस्न मंत्री गुदिन्हो हांणी हाजीर केलो.
नौदळान हांगच्या कांय घर धनयांक बांदकामांची उंचाय तीन मिटर्स दवरपाक खातीर परवानगी दिल्ली. आतां ती देड मिटर दवरात अशें सांगून बांदकामां मोडलीं. नौदळान स्वता उंच इमारती बांदल्यात. स्वता खातीर एक कायदो आनी सामान्यां खातीर एक जावपाक शकता? असो प्रस्न तांणी विचारलो. नौदळान उंच इमारती बांदपाक थळाव्या प्रशासना कडल्यान परवानग्यो घेतल्या? घेतल्या जाल्यार ताचीं कागदपत्रां दाखोवचीं. काय नौदळाक इमारती बांदपाक थळाव्या प्रशासनाचे परवानगेची गरज ना? हें तांणी स्पश्ट करचें अशें गुदिन्हो हांणी म्हणलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
