भांगरभूंय | प्रतिनिधी
पणजी, बातमीदार ः सांगे मतदारसंघ राखीव जावचो न्हय म्हणून एसटी समाजाक राजकी आरक्षण दिवपाक सरकार फाटीं सरता असो आरोप समाज वावुरपी रामा काणकोणकार हांणी केलो. बिरेस्तारा राष्ट्रीय ओबीसी महासंघान एसटी समाजाच्या उपोशणाक तेंको दिलो. ह्या वेळार मधु नायक सयत हेर आंदोलनकर्ते हाजीर आशिल्ले.
सांगे मतदारसंघांत एसटी समाजाची लोकसंख्या चड आसा. आरक्षण लागू जाल्यार हो मतदारसंघ राखीव उरतलो. देखून मंत्री सुभाष फळदेसाय थंयच्यान वेंचणूक लढोवंक शकचे नात. हाकाच लागून एसटी समाजाक राजकी आरक्षण दिवपाक वेळ काडटात. सरकार मंत्री फळदेसाय हांका वाचवंक सोदता, असो दावा काणकोणकार हांणी केलो.
पूण हो राज्यांतल्या सगल्या एसटीं समाजाचेर अन्याय जाता. मुख्यमंत्री डॉ. प्रमोद सावंत हांणी हे विशीं स्पश्टीकरण दिवचें. सरकाराची इत्साशक्त आसल्यार एका दिसा भितर आरक्षणाची अधिसुचोवणी जारी करूं येता. हाचे आदीं काश्मीरांतय 2011 वर्साचे जनगणनेच्या आदाराचेर अशें आरक्षण दिलां. तेच तरेन गोंयांक तें दिवप शक्य आसा, अशें तांणी सांगलें.
राज्यांत एसटी, एससी, ओबीसी समुदायाची लोकसंख्या 70 ते 75 टक्के आसा. राज्याच्या फुडाऱ्यांनी आनी मंत्र्यांनी हें समजून घेवन तांची मागणी मान्य करप गरजेचें आसा. एसटी भाव आपल्या घटनात्मक हक्का खातीर झगडटात. चडशा राज्यांनी अशें आरक्षण दिलां. गोंयांतय तें मेळप गरजेचें. आमी ओबीसी मतदारसंघा वतीन तांका पुराय तेंको दितात अशें मधु नायक हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
