भांगरभूंय | प्रतिनिधी
ब्रिटनांत आलाशिरो मागपी भारतीयां मदीं दुपेटीन वाड
लंडन, खबरां संस्था ः ब्रिटनांत आलाशिरो मागपी भारतीयांचो आंकडो दुपेटीन वाडला. ब्रिटीश सरकाराच्या अहवाला प्रमाण, 2023 वर्सा आलाशिरो मागपी भारतीयांचो आंकडो 5,253 आशिल्लो. जाल्यार 2022 वर्सा हो आंकडो फकत 2,612 आशिल्लो. फाटल्या वर्सा इंग्लीश चॅनल (डंकी मार्ग) बेकायदेशीर रितीन हुपून ब्रिटनांत वचपी भारतीयांचो आंकडो वाडला. 2022 वर्सा 748 भारतीयांनी आपलो जीव धोक्यांत घालून डंकी मार्ग हुपलो, जाल्यार 2023 वर्सा हो आंकडो वाडून 1192 जालो. 2023 वर्सा बेकायदेशीर रितीन अमेरिकेंत प्रवेश करपी भारतीयांचो आंकडो विक्रमी एक लाख आशिल्लो. 2022 वर्सा 65 हजार भारतीयांनी बेकायदेशीर रितीन अमेरिकेंत प्रवेश केल्लो. आलाशिरो मागप्यांच्या 140 भारतीयांच्या अर्जाचेर विचार केला. 2023 वर्सा ब्रिटनांत आलाशिरो मागपी 5253 भारतीयां मदल्या फकत 140 अर्जांचो सुरवातीच्या पांवड्यार विचार जालो. ब्रिटनांत आलाशिऱ्या खातीर 5 वर्सांत तीन फावटीं अर्ज करूंक शकतात.
60% भारतीय तरणाटे
2023 वर्सा बेकायदेशीर रितीन ब्रिटनांत प्रवेश केल्ल्या 1192 भारतीयांतले 60% तरणाटे आशिल्ले. ते 18 ते 29 वर्सां पिरायेच्या गटांत आसात. डोव्हर आनी प्लायमाऊ ह्या मार्गांतल्यान ते ब्रिटनांत प्रवेश करपाचो यत्न करतात. चडांत चड 5545 अफगाण लोकांनी घुसखोरी केली. अंदूं फेब्रुवारी मेरेन वेगवेगळ्या देशांतल्यान सुमार 2 हजार लोकांनी ब्रिटनांत प्रवेश करपाचो यत्न केल्लो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
