भांगरभूंय | प्रतिनिधी
पणजी, प्रतिनिधी : अंदूं नोव्हेंबरात जावपी सेंट फ्रान्सीस झेवीयर पवित्र अवशेश प्रदर्शन सुवाळ्या खातीर 17 कोटी रुपया खर्चून बेसिलिका चर्च वाठारांत पर्यटक तशेंच भावीकां खातीर सुविधांची उबारणी जातली. प्रधानमंत्री नरेंद्र मोदी हांणी वर्च्युअल पद्दतीन आयज ह्या कामांक सुरवात केली.
केंद्र सरकारच्या ‘प्रसाद येवजणे’ खाला ही सुविधांचीं कामां जातलीं. तीं येत्या नोव्हेंबरा पयलीं जातलीं, अशें खासदार सदानंद शेट तानावडे हांणी सांगलें. पर्यटन खात्यान बेसिलिका वाठारांत केल्ले खासा कार्यावळींत पर्यटन मंत्री रोहन खंवटे, आमदार राजेश फळदेसाय, जिल्लो पंचायत अध्यक्ष सिद्धेश नायक, सरपंच मेधा पर्वतकार आनी अधिकारी हाजिर आशिल्ले.
सेंट फ्रान्सीस झेवियर अवशेश प्रदर्शन सुवाळो 10 वर्सांनी जाता. ह्या सुवाळ्याक देश- विदेशांतले भावीक तशेंच पर्यटक येतात. भाविक तशेच पर्यटकां खातीर गरजेच्या सुविधांची उबारणी जातली.
भाजप राजवटींत देशाची सगळ्या वाठारांत उदरगत सुरू आसा. गरिबी रेशे खाला आशिल्ल्या लोकांचो आंकडो 25 कोटींनी देवला, अशें खासदार सदानंद शेट तानावडे हांणी सांगले. पर्यटन मंत्री रोहन खंवटे हांचेय उलोवप जालें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
