भांगरभूंय | प्रतिनिधी
कांदोळे 65 लाख रुपयांक घेतिल्लें घर
पणजी: सरायत नायजेरियन ड्रग्स तस्कर इवुआला उडोका स्टॅन्ली आनी ताची घरकान्न सिमरन उर्फ उषा चंदेल हांणी ड्रग्साच्या वेव्हारांतल्यान 65 लाख रुपया दिवन कांदोळे वाठारांत घर घेतिल्ल्याचें मुखार आयलां. त्याच घरांतल्यान ड्रग्साचो वेवसाय सुरू आशिल्लो. तशेंच चंदेल हाच्या एका बँक खात्यांत एका वर्सांत सुमार 40 लाख रुपया रोख रक्कम जमा केल्ल्याची म्हायती मुखार आयल्या.
ड्रग्स तस्करी प्रकरणांत गुप्तहेरांचे म्हायती वेल्यान केंद्रीय नार्कोटीक कंट्रोल ब्युरोच्या (एनसीबी) गोंय विभागान मुड्डोवाडो-साळगांवां राजू साळगांवकार ह्या ‘रेन्ट ए बायक’ ऑपरेटराच्या घराचेर धाड घालून 7.35 ग्राम कोकेनाची 9 पाकिटां जप्त केलीं. त्या वेळार ताची चवकशी केली तेन्ना, तांणी वयलो ड्रग्स कांदोळी हांगासरल्या सरायत नायजेरियन ड्रग्स तस्कर इवुआला उडोका स्टॅन्ली हाचे कडल्यान घेतिल्ल्याची तशेंच ताची घरकान्न ड्रग्साचो अर्थीक वेव्हार पळयत आशिल्ल्याची म्हायती दिवन ताचो फ्लॅट दाखयलो.
ते प्रमाण एनसीबीन थंय गेले तेन्ना सरायत नायजेरियन ड्रग्स तस्कर इवुआला उडोका स्टॅन्ली हाका तेलंगणा पुलिसांच्या पंजागुट्टा पुलिसांनी अटक केल्ल्याची म्हायती ताची घरकान्न सिमरन उर्फ उषा चंदेल हाणें दिली. ते प्रमाण एनसीबीन तिची चवकशी करपा खातीर तिका कचेरेंत हाडून तपासांत सहकार्य करीत नाशिल्ले खातीर अटक केली.
तिची चवकशी केली तेन्ना, तिच्या एका खाजगी बँक खात्यांत फाटल्या एका वर्सांत 40.20 लाख रुपया रोख रक्कम जमा जाल्या. तशेंच ताच्या खात्यांतल्यान एक ते चार लाख रुपया अशी मोटी रक्कम मेळून 26.90 लाख रुपया काडिल्ल्याचें मुखार आयलां.
हे विशीं एनसीबीन तिची अदीक चवकशी केली तेन्ना, तिचो घरकार स्टॅन्ली विदेशी नागरीक आशिल्ल्यान ताचे कडेन बँक खातें ना. ताका लागून वयल्या तशेंच हेर बँक खात्यांतल्यान सगल्या ड्रग्साचो अर्थीक वेव्हार तो करतालो. तशेंच फ्लॅटांतल्यान ड्रग्साचो वेव्हार करीत आशिल्ल्याची म्हायती दिली. तशेंच ड्रग्साची तस्करी खातीर ‘रेन्ट अ बायक’ आनी बॅक ऑपरेटरांचो तशेंच टॅक्सीचो चडसो सहभाग आशिल्ल्याची म्हायती दिली.
स्टॅन्ली आनी घरकान्न उषा चंदेल हांणी 1 जानेवारी 2024 दिसा ड्रग्साच्या वेव्हाराचे 65 लाखरुपया दिवन कांदोळे घर खरेदी केल्ल्याची म्हायती दिली. फुडारांत आनीक खूबशे अटक जावपाची शक्यताय आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
